L'Americana Mikaela Shiffrin gudogna il classament general da la cuppa mundiala da las dunnas. Quella decisiun è crudada oz en il davos super-G da la stagiun a Courchevel. Mikaela Shiffrin è vegnida segunda. Ella po cun quai schlargiar ses avantatg en il classament general uschè ferm, che sia concurrenta directa, Petra Vlhova, na po betg pli passar. Vlhova è oz vegnida 17avla.
Gudagnà il davos super-G da la stagiun ha la Norvegiaisa Ragnhild Mowinckel. Per ella èsi l'emprima victoria en la cuppa mundiala. Sin plaz dus è Mikaela Shiffrin (+0,05 secundas), sin il terz plaz è la Svizra Michelle Gisin (+0,13).
Las prestaziuns da las Svizras
- 3. Michelle Gisin, +0,13 secundas
- 6. Corinne Suter, +0,57
- 9. Jasmine Flury, +0,92
- 11. Joana Hählen, +0,94
- OUT Lara Gut-Behrami
Las duas davosas cursas da la stagiun han lieu questa fin d'emna: In slalom la sonda ed in slalom gigant la dumengia.
Culla pitschna va a Federica Brignone
La decisiun per la culla pitschna en la disciplina super-G è schon crudada avant la cursa. La Taliana Federica Brignone aveva avant la cursa 132 puncts avantatg sin sia cunpatriota Elena Curtoni.
