Cumenzà ha la stagiun anc tut stupent per Fabrizio Cavegn e ses Bristol Rovers. Dals emprims diesch gieus da campiunadi han els gudagnà tschintg, ed era Fabrizio Cavegn è stà durant quest temp en furma. En ils emprims diesch gieus da campiunadi ha el sajettà quatter gols. Mo dapi l'entschatta october n'ha il club gudagnà betg in soli gieu da campiunadi.
I schai vi da tuts da puspè vegnir or da questa rusna.
Diesch gieus en roda ha il club pers, ed er il Lumnezian spetga dapi lura sin in gol en la «League Two» – la quart auta liga englaisa. Victorias e gols da Fabrizio Cavegn hai mo anc dà en gieus da cuppa. En tut ha el sajettà fin ussa set gols per il club. «Jau sun attatgader e mes pensum è da far gols». E quai na grategia actualmain betg sco giavischà, conceda el.
Per l'attatgader da 23 onns èsi ina situaziun nova. En ina tala crisa n'è el anc mai stà cun in club. Betg da junior, betg tar Schluein/Glion sco giuvenot da 16 onns, betg tar l'U21 da Son Gagl ed era betg durant ils dus onns tar il FC Vaduz. Diesch terradas en seria ruian vi da la fidanza, sa era Fabrizio Cavegn e cler n'è l'atmosfera en l'equipa era gia stada meglra. El è dentant persvas ch'i vegn puspè megliers temps. «La stagiun da campiunadi è lunga cun 46 gieus. Nus avain peda da meglierar la situaziun».
Jau sun actual en ina fasa d'emprender. Sco persuna e per tia carriera poss ti emprender or da talas situaziuns.
Il Lumnezian ha adina gia avertì ch'el vegnia era ad avair insacura ina fasa pli difficila durant sia carriera sco ballapedist. Ussa è quella qua. Tenor el saja impurtant da guardar enavant e betg memia fitg enavos.
Bristol cun ses 500'000 abitants è dapi quatter mais la nova patria
Bristol en il sidvest da l'Engalterra n'è sa chapescha betg da cumparegliar cun Vella e la Val Lumnezia - la patria da Fabrizio Cavegn. La vita, la glieud ed insumma il mintgadi a Bristol plascha dentant ad el. En il temp liber giauda el da perscrutar in pau sia nova patria. Per gronda part è el dentant da chattar sin la plazza da ballape.
La famiglia e mia amitga èn tut per mai. Al cumenzament èsi er stà grev da betg pudair discurrer mintga di cun els. Ma uss telefonesch jau mintga di cun l'amitga e la famiglia.
Cun en tut 46 gieus da campiunadi e differents gieus da cuppa è la stagiun fitg intensiva. «Durant dis libers giaud jau er magari da simplamain pussar». Il pli fetg giauda l'attatgader da 23 onns dentant sch'el survegn visitas da chasa. Da l'amitga, da la famiglia u era da collegas.