Dapi ils onns otganta datti tschairas che sa cumponan er da fluor. Quai è ina chemicalia che gida da tegnair davent l’aua dals skis, u dals skis da passlung. Gest tar cundiziuns bletschas è la tschaira fitg populara. La naiv tatga uschia bler pli pauc vi dal ski. Gia dapi in temp as discuta davart in scumond perquai ch'ina tscherta concentraziun da fluor po causar cancer e fa donn a la natira. Dapi questa stagiun vala la regla che fluor na dastga betg pli vegnir duvrà per tschairar skis tar las cursas da l’elita. Il scumond è dentant er vegnì schlargià sin cursas popularas.
Emprimas controllas tar la cursa da dunnas
Il scumonda da pudair duvrar tschairas da fluor è vegnì sin questa stagiun d’enviern. L’entschatta da la stagiun mancavan anc las maschinas ed ils indrizs per controllar concentraziuns da fluor sin il ski. Er l’organisaziun dal Maraton da skis engiadinais ha fatg squitsch sin la Federaziun Internaziunala da skis FIS, per survegnir da quests indrizs. Uss èn els avant maun e pronts per vegnir duvrads. La premiera haja dà tar la cursa da dunnas nua ch'ils skis da 22 atletas èn vegnids controllads. Quatter da quellas èn alura vegnidas disqualifitgadas.
Betg mettai fluor sin ils skis da passlung, vus vegnis traplads.
Exclus dus onns da las cursas dal Maraton
Per quellas e quels che vegnan traplads tar il Maraton da skis engiadinais cun tschaira da fluor datti chastis. Las passlunghistas ed ils passlunghists vegnan publitgads cun num sin las glistas da rangs ed exclus durant dus onns da tut las cursas dal Maraton. La FIS sco organ da controlla vegn ad intensivar las controllas tar il Maraton. Ils organisaturs da las cursas en Engiadin'Ota appelleschan perquai a l’atgna responsabladad e da sa tegnair consequent vi dal scumond.
