Giuliana Werro ha gudagnà la cursa da las dunnas da Malögia a S-chanf en bun 1 ura e 43 minutas. Ella è uschia stada radund ina mesa minuta pli sperta che Nadja Kälin da San Murezzan ch'aveva gudagnà l’onn passà il maraton engiadinais. Cumplettà il podest sco terza ha la Turitgaisa Anja Weber.
Las pli spertas dunnas
- Giuliana Werro (SUI)
- Nadja Kälin (SUI)
- Anja Weber (SUI)
Tar ils umens han ils Franzos pudì festivar ina victoria dubla. Arnaud Chautemps ha battì en il sprint final ses cumpatriot Tom Mancini ed uschia triumfà per l’emprima giada en l’Engiadina, quai en in temp dad 1 ura e 33 minutas. Meglier Svizzer è Jason Rüesch da Tavau vegnì sco terz. Roman Furger che leva gudagnar ses 5avel maraton da l’Engiadina è vegnì 6avel, Dario Cologna ha en ses emprim onn betg sco profi terminà il maraton sin plazza 14.
Ils pli sperts umens
- Arnaud Chautemps (FRA)
- Tom Mancini (FRA)
- Jason Rüesch (SUI)
Menduri Kasper tira bilantscha positiva
Il CEO dal Maraton da skis engiadinais è cuntent cun la cursa. Malgrà la pauca naiv e las grevas cundiziuns èsi stà pussaivel da realisar il maraton. Davart la Meierei e ch'i pudess dar là temps da spetga pli lungs, avevan ils organisaturs infurmà gia ordavant. Uschia n'hai dà nagina nauscha surpraisa. Igl è stà da l'entschatta davent cler ch'i vegnia ad ir là pli ditg.
Punct neuralgic – Meierei
Cun la pauca naiv n'han ils organisaturs betg pudì manar il traject, sco usità tras il Guaud da Staz. Uschia han ils curridurs e las curriduras stuì ir quest onn sur il Lai da San Murezzan. Là hai dentant dà in punct neuralgic – la Meierei. Perquai han ils curridurs e las curriduras per part stuì spetgar, ma empè da schletta luna, han ins lura simplamain discurrì cun ils vischins dretg e sanester.
Las cundiziuns eran in pau spezialas causa a la mancanza da naiv. Sur ils lais è il glatsch vegnì sgrattà si ed il rest da la cursa ha gì baud be naiv artifiziala. Ils curridurs e la curriduras eran dentant cuntents e cuntentas ch'els han pudì far in maraton en questas cundiziuns.
Ultima cursa per Furger
Roman Furger ha finì cun il Maraton da skis engiadinais sia carriera sco profi. El n'ha betg dumagnà da defender ses titel da l'onn passà.
Amez la fulla – Seraina Mischol
Quai è stà ina premiera per l’anteriura passlunghista e victura dal maraton dal 2009, Seraina Mischol. RTR ha engascha ella sco dunna da camera. Cun quai ha ella vis il maraton d'ina autra perspectiva.
Ils 42 kilometers fan ils blers e las bleras participantas senza bagascha. Seraina Mischol però ha purtà cun ella ina camera ed apparats tecnics cun ina paisa da radund 3 kilos.
