Siglir tar il cuntegn

Header

video
Puspè Maraton da skis engiadinais suenter lunga pausa
Or da Telesguard dals 14.03.2022.
laschar ir. Durada: 4 minutas 33 Secundas.
cuntegn

Maraton da skis engiadinais Furger batta Cologna tar sia derniera

Roman Furger dad Altdorf ha gudagnà per la 4. giada il Maraton da skis engiadinais. El ha batti en il sprint final Dario Cologna ed il Franzos Tom Mancini. Tar las dunnas ha triumfà la giuvna indigena Nadja Kälin da San Murezzan avant las duas franzosas Céline Chopard Lallier ed Enora Latuillière.

Ils pli sperts umens:

  1. Roman Furger 1:35.59,5
  2. Dario Cologna +1,7 sec.
  3. Tom Mancini (Frantscha) +2,7 sec.
  4. Jonas Baumann +4,0 sec.
  5. Jean-Marc Gaillard (Frantscha) +6,1 sec.

Puspè stat Roman Furger sisum il podest dal Maraton da skis engiadinais. Per l'Uranais da 32 onns è quai la quarta victoria. El ha uschia er impedì che Dario Cologna ha triumfà per la 5avla giada al maraton da Malögia a S-chanf. Il Jauer è ids la davosa giada a la partenza dal Maraton da skis engiadinais sco sportist professiunal. En duas emnas terminescha Cologna lura definitivamain sia carriera als campiunadis svizzers da passlung a Zweisimmen en il chantun Berna.

video
Roman Furger impedescha la 5avla victoria da Dario Cologna
Or da Sport-Clip dals 13.03.2022.
laschar ir. Durada: 1 minuta 16 Secundas.
video
Furger: «In dals pli bels maratons ch'jau sun currì»
Or da Sport-Clip dals 13.03.2022.
laschar ir. Durada: 1 minuta 58 Secundas.
video
Cologna: «Igl è stà emoziunal»
Or da Sport-Clip dals 13.03.2022.
laschar ir. Durada: 1 minuta 26 Secundas.

Las pli spertas dunnas:

  1. Nadja Kälin 1:46.31,1
  2. Céline Chopard Lallier (Frantscha) +1,8 sec.
  3. Enora Latuillière (Frantscha) +4,0 sec.
  4. Elisa Brocard (Frantscha) +8,3 sec.
  5. Seraina Boner +1.50,7 minutas
video
Nadja Kälin cuntanscha l'arrivada sco emprima dunna
Or da Sport-Clip dals 13.03.2022.
laschar ir. Durada: 37 Secundas.

Premiera per Nadja Kälin

Er tar las dunnas hai dà ina victoria svizra. Nadja Kälin ch'ha pir 20 onns ha gudagnà a sia cursa da chasa. Ella ha procurà per la differenza encunter la concurrenza franzosa sin il davos kilometer. Nadja Kälin da San Murezzan ha uschia procurà per la terza victoria svizra en seria. Il 2019 aveva Nathalie von Siebenthal gudagnà, l'onn avant Nadine Fähndrich.

audio
Hitsch Flury il schef da passlung tar Swiss Ski ha plaschair da las prestaziuns
ord RTR Audio dals 13.03.2022.
laschar ir. Durada: 3 minutas 38 Secundas.

Cundiziuns perfetgas

Bun 11'400 persunas èn sa participadas da bell'aura e bunas cundiziuns a la 52avla ediziun dal Maraton da skis engiadinais. Quai suenter che la cursa populara n'ha betg gì lieu ils davos dus onns pervia da la pandemia da corona.

audio
Impressiuns da curriders e curriders da la cursa populara
ord Actualitad dals 14.03.2022.
laschar ir. Durada: 3 minutas.

Gia baud han ils organisaturs dal Maraton da skis engiadinais concepì variantas co evitar dad avair ina gronda massa da glieud a la partenza. Uschia è naschida l’idea da laschar partir ils passa 10'000 curridurs e curriduras en undas per la cursa. Quai è capità cun 29 differentas undas entaifer 1 ura e 28 minutas.

audio
Bilantscha dal CEO Menduri Kasper suenter il maraton 2022
ord Actualitad dals 14.03.2022.
laschar ir. Durada: 2 minutas 39 Secundas.

Tut en tut èn 40 naziuns stadas a la partenza. Bun 80% da tut las curridras ed ils curriders èn stads svizzers. Radund 20% a la partenza eran dunnas. Era blers e bleras aspectaturas han chattà la via agl ur da la loipa dal Maraton da skis engiadinais. Sut quels perfin in u l'auter prominent.

audio
Cusseglier naziunal Martin Candinas sco aspectatur al maraton
ord RTR Audio dals 13.03.2022.
laschar ir. Durada: 4 minutas 23 Secundas.

Cun Anna Tina Flepp al maraton

Ina da las partizipantas è Anna Tina Flepp stada. Pervia da la pandemia è sia premiera sa retarda, il 2022 finalmain èsi lura reussì. Suenter 3 uras e 20 minutas è ella arrivada a S-chanf, surlevgiada cunquai che las cundiziuns èn stadas pli pretensiusas che spetgà.

video
Anna Tina Flepp e sia premiera al maraton
Or da Telesguard dals 14.03.2022.
laschar ir. Durada: 2 minutas 44 Secundas.

RTR ha accumpagnà

Gian Gilli e Livio Foffa.
Legenda: RTR ha emess live dal maraton da skis cun l'anteriur scheftrenader passlung da Swiss Ski, Gian Gilli. RTR, Andreas Wieland

La cursa en survista:

RTR Radio Maraton 08:00

Artitgels legids il pli savens

Scrollar a sanestra Scrollar a dretga