Siglir tar il cuntegn

Header

cuntegn

Maraton da skis engiadinais Bell'aura, nov sistem e victorias svizras

Suenter ina pausa da dus onns ha il Maraton da skis engiadinais puspè gì lieu. L’ediziun 2022 ha gì inqual midament. Uschia èn las participantas ed ils participants partì en 29 differentas undas.

Il ticker è a fin

  • 13:44

    Quai èsi stà!

    Grazia fitg, cun quai èsi stà quai cun il liveticker. Qua sut chattais Vus resultats, intervistas ed ulteriuras infurmaziuns dal maraton da skis.

  • 13:19

    Emprima bilantscha positiva

    Il CEO dal maraton da skis engiadinais tira in'emprima bilantscha positiva da l'occurrenza. Quai malgrà ch'i ha dà pervia da la pandemia in zic pli paucas participantas e participants. Cuntents èn ils organisaturs cunzunt ch'il nov sistem cun la partenza en undas haja funcziunà sco giavischà. El en l'intervista cun RTR:

    audio
    Menduri Kasper è cuntent
    ord RTR Audio dals 13.03.2022.
    laschar ir. Durada: 7 minutas 48 Secundas.
  • 12:18

    L'emprima giada al maraton

    Dus onns n'ha il maraton da skis engiadinais betg gì lieu. Blers e bleras han spetgà ditg sin la 52avla ediziun. Per tscherts è il maraton 2022 stà l'emprim insumma. Uschia per exempel era per Anna Tina Flepp da Surrein.

    video
    Anna Tina Flepp al maraton da skis engiadinais - Part 1/2
    Or da RTR Social dals 07.03.2022.
    laschar ir. Durada: 4 minutas 5 Secundas.
  • 12:15

    Zic e zic vegnan era ils curriders e las curridras da la cursa populara en l'arrivada

    La pli gronda cursa populara d'enviern da la Svizra ha tratg participants e participantas da tuttas regiuns e naziuns a la partenza. Blers e bleras han gia la cursa davos els ed én a S-chanf en l'arrivada vida giudair il sulegl, spetgar sin ils collegs e collegas e sa revegnir.

    Maraton da skis engiadinais.
    Legenda: Ils emprims da la cursa populara èn gia en l'arrivada. RTR
  • 11:44

    Il maraton en cifras

    Bun 11'400 persunas èn idas a la partenza dal 52avel maraton da skis engiadinais. 8'291 Svizzers e Svizras. Vers 1'400 da la Germania, 267 da l'Italia, 186 da l'Austria, 181 da la Frantscha èn sa participads. Ils pli blers Svizzers a la cursa èn dal chantun Turitg, total 2'216, dal chantun Grischun èn 1'724 sa participads. Il pli vegl participant è da l'annada 1924, pia 93 onns.

  • 11:14

    Segund plaz per Dario Cologna tar sia davosa cursa da sia carriera professiunala:

    audio
    Dario Cologna: «A la fin ha il ferm gudagnà»
    ord RTR Audio dals 13.03.2022.
    laschar ir. Durada: 3 minutas 10 Secundas.
  • 11:01

    L'indigena Nadja Kälin suenter sia victoria al maraton da skis en l'intervista cun RTR:

    audio
    Nadja Kälin: «Quai è fitg spezial da gudagnar la cursa da chasa»
    ord RTR Audio dals 13.03.2022.
    laschar ir. Durada: 1 minuta 35 Secundas.
  • 10:45

    Il victur Roman Furger en l'intervista cun RTR:

    audio
    Roman Furger: «Mes plan è gartegià»
    ord RTR Audio dals 13.03.2022.
    laschar ir. Durada: 2 minutas 16 Secundas.
  • 10:16

    Victoria svizra era tar las dunnas

    Nadja Kälin gudogna il maraton da skis engiadinais da las dunnas. Quai cun in temps da 1:46:31,1. La giuvna da San Murezzan da 20 onns gudogna avant las Franzosas Céline Chopard Lallier ed Enora Latullière.

    Plaz dals podest tar las dunnas.
    Legenda: Ils podests tar las dunnas. Swiss image
  • 10:13

    Roman Furger gudogna il 52avel maraton da skis engiadinais

    Roman Furger gudogna per la 4 giada il maraton da skis engiadinais. Quai cun in temps 1:35:59,5 avant Dario Cologna ed il Franzos Tom Mancini.

    Plazzas da podest tar ils umens.
    Legenda: Las plazzas da podest tar ils umens. Swiss Image
  • 9:51

    Segund temps intermediar

    A La Punt suenter 34.8 kilometers curt avant l'arrivada è Marino Capelli a la testa cun in temps intermediar da 1:16:52.8, sin plazza 2 Roman Furger, terz è Jonas Baumann. Dario Cologna sa chatta sin plazza 5.

    L'emprima dunna Elisa Brocard è arrivada suenter 1:25:24.1 a La Punt. Céline Chopard Lallier sin plazza 2 avant la Svizra Nadja Kälin.

  • 9:28

    Temps intermediar

    Ils svizzers a la testa. Dario Cologna maina suenter la mesadad dal maraton cun in temps intermediar da 48:19.7, suenter el cun in retard da 0.60 secundas Jonas Baumann sco segund e Roman Furger sco terz.

    Tar las dunnas è la Franzosa Enora Latuillière cun in temps intermediar da 54:40.1 avant Céline Chopard Lallier e la Taliana Elisa Brocard. La Svizra Nadja Kälin è per il mument sin plazza 3.

  • 9:14

    Curt avant Puntraschigna

    Suenter 15 kilometers ha l'elita dals umens surpassà las dunnas. L'elita è ussa gia sperasvi San Murezzan e sa chatta en direcziun Puntraschigna. Jonas Baumann è a la testa da la cursa.

  • 8:41

    Dario Cologna en il focus

    Era ils umens èn partì. Il numer 1 porta Dario Cologna. El va a la partenza sco defensur dal titel e sco davosa giada sco profi avant ch'el terminescha sia carriera professiunala. Concurrenza datti dentant era da l'atgna terra – Roman Furger cun il numer 5 e Jonas Baumann cun il numer 3 e Roman Schaad cun il numer 4.

    audio
    Dario Cologna en il focus
    ord RTR Audio dals 13.03.2022.
    laschar ir. Durada: 4 minutas 24 Secundas.
  • 8:29

    L'elita da las dunnas è partida

    La 52avla ediziun dal maraton ha cumenza! L'elita da las dunnas è partida a Malögia. En curt partan era ils umens.

  • 8:18

    Curt avant la partenza

    Gia baud han ils organisaturs dal Maraton da skis engiadinais concepì variantas co evitar dad avair ina gronda massa da glieud a la partenza. Uschia è naschida l’idea da laschar partir ils passa 10'000 curridurs e curriduras en undas per la cursa. Totalmain datti ussa 29 differentas undas da partenza. Aifer 1 ura e 18 minutas partan las 29 undas per la cursa. L’emprim sa chapescha l’elita da las dunnas e l’elita dals umens las 08:25, respectiv las 08:30 e suenter tut ils auters. Curt avant la partenza datti gia grond travasch a la partenza a Malögia.

    audio
    Impressiuns curt avant la partenza
    ord RTR Audio dals 13.03.2022.
    laschar ir. Durada: 3 minutas 23 Secundas.
  • 7:57

    Bainvegni!

    Bainvegni al liveticker dal maraton da skis engiadinais. Qua tegnain nus vus sin il current tge che curra e passa oz durant la cursa. L'emissiun Live ‘Radiomaraton’ da las 08:00 – 12:30 en il radio u qua online a partir da las 08:00.

Midadas suenter dus onns pausa

La 52avla ediziun dal Maraton da skis engiadinais ha gì lieu cun in nov sistem da partenza. Totalmain hai dà 29 differentas undas da partenza. Sper il nov sistem da partenza haì era dà ina correctura dal traject. Enstagl dad ir a Puntraschigna tar kilometer 21 sut il sviament da la via chantunala, haì dà ina nova punt en il conturn dal center da passlung «Cuntschett», nua ch'il traject maina uss sur la nova punt da l’Ova da Roseg. Qua sut la survista:

RTR Radio Maraton 08:00

Artitgels legids il pli savens

Scrollar a sanestra Scrollar a dretga