Siglir tar il cuntegn

Header

audio
Bilantscha da Menduri Kasper
Or da Actualitad dals 06.03.2023. Maletg: RTR
laschar ir. Durada: 3 minutas 56 Secundas.
cuntegn

Maraton da skis engiadinais Carla Wohler è la victura da la cursa da las dunnas

Las curridras indigenas han fatg furora tar la cursa da dunnas da Samedan a S-chanf. La 22avla ediziun da la cursa gudogna Carla Wohler da Spiez, creschida si a Scuol – avant Helena Guntern da Ftan e la schumellina Chiara Wohler.

Tar cundiziuns perfetgas e temperaturas da primavaira ha gì lieu la cursa da las dunnas. Questa cursa è il tun da partenza da l’emna dal Maraton da skis engiadinais, e la prova generala per la cursa gronda la dumengia. E questa cursa è vegnida dominada da curridras indigenas. Las emprimas tschintg èn tuttas engiadinaisas.

audio
Carla Wohler da Scuol/Spiez gudogna cursa da dunnas
ord Actualitad dals 05.03.2023. Maletg: RTR
laschar ir. Durada: 2 minutas 9 Secundas.

Emprima victoria per Carla Wohler

La pli sperta sur ils 17 kilometers da Samedan a S-chanf era Carla Wohler. La giuvna da 22 onns è creschida si per gronda part a Scuol, viva oz dentant pervi da motivs professiunals a Spiez en il chantun Berna. Carla Wohler ha gia pudì sa distatgar baud cun ina gruppa da diesch curridras dal rest da la cursa. E sin ils ultims trais kilometers ha ella ensemen cun Helena Guntern da Ftan augmentà anc ina giada il tempo, e pudì gudagnar in per meters.

Omaduas curridras èn alura vegnidas ensemen sin ils davos meters, e qua ha Carla Wohler gì dapli reservas ed ha uschia pudì gudagnar la cursa en il sprint. Segunda è vegnida Helena Guntern da Ftan. E terza la sora schumellina da Carla Wohler, Chiara Wohler. Manchentà il podest per pauc ha Flurina Eichholzer-Bott da Zernez sco quarta.

Prova generala gartegiada

La cursa da las dunnas in’emna avant il Maraton da skis engiadinais è la prova generala per la cursa che segua alura. Tut ha funcziunà perfetg. La loipa è en in fitg bun stadi e tut las mesiras en connex cun la naiv ch'è stgarsa e las temperaturas che sumeglian a la primavaira han funcziunà fitg bain. Uss pia è tut pront per il grond spectacul dal Maraton sur 42 kilometers la proxima fin d’emna.

RTR actualitad 17:00

Artitgels legids il pli savens