Per l’emprima giada ha la cursa da notg dal Maraton da skis engiadinais gì lieu sin in traject viceversa. Pervia da la situaziun precara sin ils lais da l’Engiadin'Ota han ils organisaturs decidì da sviar ils lais e da partir questa giada da La Punt, 16 kilometers da la val ensi fin a Puntraschigna. E la cursa fin a Puntraschigna ha procurà per alas a las atletas ed als atlets indigens. Tar ils umens han Roman Alder ed Elia Beti, omadus da Puntraschigna festivà ina victoria dubla. Tar las dunnas è Ilaria Gruber da Silvaplauna currida sin plazza dus.
Midament a curta vista: nagin problem
La gievgia baud en damaun han ils organisaturs da la cursa decidì da manar quella viceversa, vul dir da la val ensi enstagl aval. Uschia han ins installà en temp da record ina nova partenza da la cursa da notg a La Punt. Las curriduras ed ils curridurs han uschia stuì currer via la plazza aviatica e la plazza da golf da Samedan, direcziun Punt Muragl – e da là lura vers Puntraschigna. La midada da program n'haja fatg nagins problems. Tut haja funcziunà sco giavischà.
Malgrà ils midaments nov record da participantas e participants
Anc mai han passa 800 curriduras e curridurs fatg part a la cursa da notg. La sisavla ediziun na va uschia betg be pervia dal midament dal traject en las annalas, dentant era perquai ch'anc mai han tantas passlunghistas e passlunghists fatg part a la cursa. La cursa da notg carmalescha adina dapli sportistas e sportists che vulan far quest sport la notg, cun ina glisch sin il chau.
