S-chanf - Midar l’areal a S-chanf en ina arena d’arrivada

Gia dapli blers onns è Thomas Pinchera il responsabel per l’infrastructura da l’arrivada dal Maraton da skis engiadinais a S-chanf.

Per che tut funcziuna senza incaps cumenzan ils organisaturs dal Maraton da skis d'installar l’infrastructura necessaria in pèr dis avant la cursa da dunnas – la cursa ch’ha festivà quest onn ses giubileum da 25 onns e ch'è il tun da partenza en l’emna dal maraton. Gia per la cursa da dunnas, ch’è sa chapescha bler pli pitschna ch'il maraton da 42 kilometers, dovri l’arena da l’arrivada.  

800 cubics naiv tecnica e kilometers saiv e cabels

La basa per l’arena da l’arrivada è la loipa. Quest onn han ins stuì producir enturn 800 cubics naiv tecnica. Or da quella vegn furmada la loipa sin ils davos pèr tschient meters dal maraton e l’entira arena da l’arrivada. Sper la naiv che vegn stumplada en l’arrivada dovri era circa 1.2 kilometers saiv, che partan las differentas zonas: quella da la loipa, quella suenter l’arrivada nua che las curriduras ed ils curridurs survegnan lur medaglia per avair dumagnà il Maraton da skis engiadinais e per tegnair davent aspectaturas ed aspectaturs da la loipa da cursa. Sper quai dovri circa anc uschè blers meters cabel per la mesiraziun dal temp, per ils autpledaders e per da tut la sort apparats che procuran per ina buna impressiun a l’arrivada.

Curriduras e curridurs duain propi sa sentir arrivads suenter 42 kilometers e numerus strapatschs en l’arrivada.

Senza infrastructura dal militar na funcziunass quai betg

L’entira infrastructura en l’arrivada dal Maraton da skis ha ses lieu. Da las pussaivladads sanitaras, fin tar las tendas nua che ins sa midar vestgadira, fin tar il post da samaritans, la controlla da doping, ils tests da fluor ed ils stans cun liongias ed insatge da baiver. Senza l’infrastructura existenta dal militar a S-chanf na fiss quai prest betg pussaivel dad installar tut.