Dapi in per dis sa prepara l’equipa naziunala da ballape sin l’Euro 2020. Quai fa ella a Bogn Ragaz, en il lieu nua che era la Grezia aveva passentà l’onn 2004 ils davos dis avant l’Euro. Quai che è alura capità en Portugal è istorgia. La Grezia aveva gudagnà dal tuttafatg surprendentamain il titel.
Crescher ensemen sco equipa
Ils davos dis avant che l’Euro cumenza passentan ils giugaders da l’equipa naziunala gia ensemen. Il champ da trenament avant l’Euro è il tun da partenza per la campagna dal turnier. A Bogn Ragaz dess l’equipa crescher ensemen, ed ir lura sco uniun ferma a l’Euro che è questa giada en indesch differents pajais.
Partidas da preparaziun cunter USA e Liechtenstein
Durant il champ da trenament a Bogn Ragaz dat l’equipa naziunala duas partidas da preparaziun. L’emprima encunter ils Stadis Unids. L’equipa nordamericana è fitg ambiziusa e moderna. Ella duai simular per part ils adversaris da gruppa da la Svizra durant l’Euro. En la fasa da gruppa s’inscuntra la naziunala cun la Valisa e l’Italia. Ils Americans savessan dar usche cumpact sco la Valisa, u alura smatgar sin il gol e dar offensiv sco l’Italia.
