Il gieu da la Svizra encunter la Frantscha è stà in vair crimi da ballape tras e tras. Suenter 15 minutas ha Haris Seferovic sajettà l'emprim gol per la Svizra. Cun quai ha el fatg sperar la Svizra sin il quartfinal.
Curt suenter ch'il goli franzos ha franà il penalti dad 11 meters da Rodriguez, ha la Frantscha fatg grazia a Benzema dus gols entaifer duas minutas (57' e 59'). Il terz gol dals Franzos è crudà entras Pogba. Las speranzas gia tar blers probabel stadas persas.
Lura èsi puspè stà Seferovic che ha laschà siemiar cun in segund gol e scursanescha al 2:3. Pudessi tuttina dar in quartfinal per la Svizra? Ed i dat il vair crimi. Gavranovic fa suenter in gol che na quinta betg, en minuta 90 tuttina anc in terz gol ed egualisescha la partida per la Svizra, al 3:3. Uschia va il gieu en la prolungaziun.
Er en la prolungaziun n'è la decisiun betg crudada. La Svizra e la Frantscha ston decider la partida cun sajettar penaltis da la distanza dad 11 meters.
- Gavranovic tutga l'emprim gol – P.Pogba tutga er 1:1
- Schär tutga – Giroud tutga 2:2
- Akanji tutga – Thuram tutga 3:3
- Vargas tutga – Kimpembe tutga 4:4
- Mehmedi tutga – Mbappe vegn franà da Sommer 5:4
Sommer tegna la balla da Mbappe. La Svizra decida en ils penaltis il gieu e bitta il campiun mundial or dal turnier. Il crimi da David cunter Goliath è ì a fin a favur da la Svizra e cun quai da David. Il plaschair è grond. Primo perquai che la Svizra ha dumagnà da vegnir ad in turnier grond en il quartfinal ed er ch'els han pudì decider il gieu per els cun sajettar penaltis.
En il quartfinal frunta la Svizra sin la Spagna.
Svizra cunter «les Bleus» – David cunter Goliath
L’affischa Svizra cunter Frantscha è sco David cunter Goliat. Cun la Frantscha sco adversari en l'otgavelfinal ha la Svizra survegnì l’adversari il pli grev pussaivel tar questa EURO. Il campiun mundial actual ha valì per blers sco favurit numer in sin il titel. L’équipe tricolore ha vulì gudagnar sco suenter il titel da campiun mundial l’onn 1998 la dubletta. Vul dir, vegnir campiun mundial e suenter gist anc ir per il titel da campiun d’Europa.
Svizra è stada top motivada
Dentant, era sche tut ha pledì en quest duel per la Frantscha. L’emprim han ins da dar la partida. Ils Svizzers han stuì crescher sur sai ora ed han er fatg quai. Els han vesì la schanza e nizzegià ella.
Las davosas giadas nua che la Svizra era en questa situaziun n'è quai betg gartegià. Tar il campiunadi mundial en Russia l’onn 2018 ha la naziunala pers cun 0:1 encunter la Svezia, l’onn 2016 tar il campiunadi d’Europa en Frantscha en la lutga da penaltis encunter la Pologna e l’onn 2014 en Brasila en la prolungaziun cun 0:1 encunter l’Argentina. Tuttas trais giadas era la Svizra fitg datiers a la qualificaziun per il quartfinal. Questa giada èsi gartegià.
Frantscha n'ha anc betg mussà il meglier ballape
En la fasa da gruppa n'è quai era betg stà necessari. La Frantscha ha dà duas giadas pari, cunter il Portugal e l’Ungaria – ed ha gudagnà encunter la Germania. En la pli difficila gruppa F ha la Frantscha tuttina gudagnà la fasa da gruppa, ed è sa qualifitgada sco emprima equipa per la runda da k.o.
