La Svizra sto tremblar per la fasa da k.o. al campiunadi europeic da ballape. Il team da Vladimir Petkovic ha pers cleramain la partida da gruppa encunter l'Italia cun 0:3. Suenter il 3:0 encunter la Tirchia ha l'Italia er dominà la squadra svizra tenor giavisch.
Per l'8avel final dovri ina victoria encunter la Tirchia
L'um dal gieu è stà Manuel Locatelli da Sassuolo, ch'ha sajettài ils dus emprims gols per ils Talians. En la 88avla ha Ciro Immobile lura anc procurà per il 3:0. Sch'ils Svizzers vulan cuntanscher l'8avel final dovri la sonda exnum ina victoria encunter la Tirchia. Cun ina terrada è il campiunadi a fin.
L'Italia è sa qualifitgada sco emprima equipa per l'8avel final e gioga la dumengia encunter la Valisa per la victoria da gruppa.
Agitaziun pervi d'alarm da bumba
Avant il gieu avea in alarm da bumba chaschunà agitaziun a Roma. En l'auto dal responsabel per parcs a la citad avevan las autoritads chattà ina bumba construtida. Tenor la gasetta «Republicca» haja il possessur da l'auto infurmà las autoritads.
Perquai che la bumba è dentant vegnida chattada radund 2 kilometers davent dal stadion dal gieu, han las autoritads sclaus ch'il cas pudess avair in connex cun il gieu dal campiunadi europeic da L'Italia e la Svizra. Al responsabel pertutgà da la bumba saja vegnì smanatschà gia avant, uschia che l'attatga saja probabel stada drizzada envers el. La bumba han las autoritads pudì deactivar.