Per la naziunala svizra da ballape è l'Euro da chasa a fin. L'equipa da trenadra Pia Sundhage perda il quartfinal encunter las campiunessas mundialas da la Spagna cun 0:2.
Ditg tegnì en vita la speranza
Ditg han las Svizras dastgà semiar dad ina sensaziun. Suenter passa 60 minutas crescha la sperenza ch'ina notg istorica è forsa tuttina pussaivla en il stadion Wankdorf a Berna. Cunquai che las Svizras han cun lur cumbat nunstanclentaivel impedì da laschar far in gol las grondas favuritas da la Spagna. Il plan da tegnair uschè ditg sco pussaivel la nulla ha funcziunà fin en la 66avla e 71avla minuta.
Lura fan las Spagnolas entaifer be 5 minutas dus gols. Tge ch'è era gist stà la decisiun. Encunter las campiunessas mundialas e la numra 1 dal ballape en Europa èn las Svizras stadas quasi be en il modus da defender. Crear sezzas schanzas e forsa perfin vegnir privlusas avant il gol da las Spagnolas, n'è tant sco mai stà il cas. Las Svizra avessan era pudì perder pli aut che quest 0 a 2. Las Spagnolas han 3 giadas tutgà la pitga. In penalti sitta Mariona Caldentey sper gol vi. In segund penalti, curt avant la fin, che Alexia Putellas sitta, tegn la golia Livia Peng cun ina parada suverana.
Trumpadas – ma era loschas
Cun far uschè ditg sco pussaivel grev il gieu a las Spagnolas ha il plan da giugaduras e trenadra funcziunà. Dapli n'è betg stà pussaivel. Las Svizras han pers encunter la meglra equipa dal mund. Pon uschia esser loschas dal prestà a lur Euro da chasa. Dentant n'è enqual larma betg stada d'evitar tar intginas giugaduras. Gugent avessan ellas fatg anc pli loscha l'entira Svizra. Ma lura avessi propi duvrà questa ominusa miracla.
Turnier da records e superlativs
Quai che las Svizras han mess en moviment, ellas cun ils fans ed ils fans cun ellas, è stà impressiunant. In'atmosfera ed in'unda d'euforia gigantica per il ballape da dunnas en noss pajais. Record gia avant ch'il campiunadi europeic ha cumenzà. Cun passa 600milli bigliets vendids. Tenor l'UEFA tants sco anc mai avant in'Euro da da las dunnas. La finala è tant sco mintga gieu vendì ora.
Plinavant è il record d'aspectaturs en ils stadions be durtant ils gieus da quartfinal vegnì realisà gia avant l'ultim gieu da quartfinal. Quai cun cuntanscher la marca da 78'407 fans. In ulteriur record, il marsch da fans, quella mar cotschna da 25melli fans ch'èn marschads tras Berna fin en il stadion Wankdorf per mirar e dar support a la naziunala svizra. Era sch'ellas han pers lur emprim gieu da quartfinal ad in turnier grond, han ellas conquistà millis e millis da cors e catapultà il ballape da dunnas en autras, novas sferas.
