La Grischuna Livia Peng è daventada il numer 1 da la naziunala svizra ed è, tenor inqual expert, ina da las meglras golias dal mund. Si'affecziun per il sport da ballape ha cumenzà baud, sin il plaz da ballape a Domat e quai pervia d'ina bun'amia da scola dad ella.
Jau na vuleva betg giugar be cun ils mats e hai perquai surmanà Livia dad era vegnir en il trenament da ballape ed ad ella hai plaschì fitg.
Regurdientschas ord l'uffanza
-
Bild 1 von 4. Amias dapi la scoletta: Michèle Hollenstein e Livia Peng. Bildquelle: MAD Michéle Hollenstein.
-
Bild 2 von 4. Tenor Michéle Hollenstein aveva Livia Peng adina si ses fruntagl cun rusnas, quai era sia spezialitad. Qua perfin sut la chapitscha. Bildquelle: MAD Michéle Hollenstein.
-
Bild 3 von 4. Gia sco giuvna focussada: Livia Peng ad in trenament da ballape. Bildquelle: MAD Michéle Hollenstein.
-
Bild 4 von 4. (dretga.) Michèle Hollenstein ad in trenament cun ils mats tar il CB Domat. Bildquelle: MAD Michéle Hollenstein.
Cun otg onns ha ella survegnì regalà da ses padrin ils emprims vons da goli ed a partir da quest mument n'ha Livia Peng betg pli vulì bandunar la posiziun tranter las duas pitgas. «Jau sun ida en gol ed hai ditg als buobs da sajettar e dapi quest mument sun jau golia.»
Fin ch'ella aveva 17 onns, ha ella trenà per gronda part cun buobs e giuvens. Sch'ella guarda oz enavos, haja quai gidà ad ella da sa far valair.
| 2009-2014 | CB Domat |
| 2014-2019 | Team da la Svizra Sidorientala |
| 2019-2022 | FC Turitg |
| 2022-2023 | BK Häcken |
| 2023 | UD Levante |
| 2023-2025 | Werder Bremen |
| 2025- | FC Chelsea |
Cun 23 onns ha ella gia dà ballape per differents clubs. En Svizra per Turitg, en Svezia tar Häcken, en Spagna tar Levante ed ils dus ultims onns tar Werder Bremen en la Bundesliga tudestga. Sin il cumenzament da proxima stagiun mida ella tar il FC Chelsea en l'Engalterra. Dal reminent ina da las meglras equipas dal mund.
Siemià dad esser il numer 1
Ses siemi da daventar il numer 1 da la naziunala svizra è daventà, suenter in vi e nà, realitad. Ditg n'èsi numnadamain betg stà cler sche ella u sche Elvira Herzog vegnia ad esser la golia da tschep durant l'EURO en Svizra. La finamira da daventar in di golia da la Svizra haja ella gì davent dal mument ch'ella haja cumenzà a dar ballape.
La golia da Domat è ina persunalitad che viva per l'esser golia. Quai ha ella adina puspè raquintà en intervistas. Ella è er enconuschenta sco fitg ambiziusa e focussada che sa exact tge ch'ella vul. E plinavant è Livia Peng er ina golia da rituals.
Uschia ha ella gia tradì en in'intervista ch'ella dormia adina cun in pèr vons da goli sut il plimatsch, sa chapescha mo vons novs. Quai è in ulteriur segn che mussa che la sportista da 23 onns è ina che na pratitgescha betg mo ina professiun, mabain ch'ella viva sco golia da ballape era ses siemi.
Livia è ina persuna fitg averta, ella è gia adina stada fitg lavurusa cun cleras finamiras, ella è ruassaivla e n'è mai sa midada era cun avair success en il sport.
Anc adina s'annunzia Livia Peng tar ses amis e famiglia a Domat era sche ella è gia daditg betg pli bler a chasa. Sco Michele Hollenstein declera è l'Euro insatge fitg spezial per la goalia. Ella saja tut impressiunada dals blers fans sin las tribunas en ils stadions da ballape.