Cuntrasts - Quatter dunnas – quatter istorgias da ballape

Livia Peng da Domat scriva sin sia pagina d'internet ch'ella viva ses siemi. E gea, ella è cun ses 23 onns gia arrivada sisum. Da preschent è ella goli nr. 1 da Werder Bremen en la 1. Bundesliga. Ella e sia squadra èn bain vegnidas fin en il final da la cuppa tudestga, ma han lura pers quel cun 2:4 cunter las dunnas da Bayern München. In cunfiert per Livia Peng è lura stà che il magazin renumà «Kicker» ha elegì ella en l'equipa cun las meglieras giugadras da l'onn.

Ursina Kerlin-Capeder è stada l'emprima ballapedista rumantscha en l'equipa naziunala ed è schizunt stada giugadra mez professiunala en l'America. In viadi tut auter che simpel. Da giuvna era ella fitg timida ed introvertida cun pauc confidenza en sasezza. Il ballape ha gidà ella da s'avrir e da cumbatter sias temas. «Jau hai vivì per il ballape blers onns, hai pudì far ina bella carriera. Quai ha avert a mai las portas per vesair il mund, per s'avrir ed embratschar il mund e la glieud».

RTR Cuntrasts

Avrir la box Serrar la box

Tut ils films chattais sin PlayRTR.

Oz viva Ursina Kerlin Capeder en l'Irlanda dal nord, ella è maridada e mamma da trais uffants, lavura sco veterinaria e dat en ses temp liber anc adina mintg'emna ballape.

Sofia Schmed stat anc a l'entschatta da sia carriera ed è tuttina gia ida in bun toc. Ses siemi: vegnir fin si en la Super League e forsa en l'equipa naziunala. Il potenzial haja ella, di il trenader actual. Ma metter tut sin ina carta, po er esser ristgà. Pervia d'ina nauscha attacca d'ina giugadra ha Sofia Schmed rut la chaviglia. Quai ha bittà ella in pau enavos. Ma ella na dat betg si uschè spert: «Sch'ins vul propi, dumognan ins tut!»

Bea Caduff è trenadra dal Team Surselva Dunnas. Per ella è ballape cuminanza, sco ina gronda famiglia, in s'inscuntrar sin il plaz da ballape ed avair plaschair. E cun plaschair vegn era la prestaziun. Gist è il team ì si en 3. liga.