Euro 2025 - La naziunala svizra per la Euro 2025 è definida

Cun Riola Xhemaili e Meriame Terchoun han ins communitgà ils davos dus nums dal cader da l'equipa naziunala svizra da ballape per il Campiunadi europeic da ballape 2025. Plinavant da la partida è er la golia grischuna Livia Peng.

Cun quai è il cader da 23 dunnas da la trenadra Pia Sundhage cumplett. In zic surprendent manca Seraina Piubel che gioga tar West Ham United. A partir da quest'emna è l'equipa naziunala svizra ad Abtwil per sa preparar sin l'Euro – l'emprim gieu è ils 2 da fanadur.

Avant la decisiun èsi stà da cumbatter

Magglingen, Nottwil, Abtwil: quai ils trais lieus nua che la naziunala da las dunnas prenda quartier las emnas che restan fin ch'il campiunadi europeic da chasa cumenza. Per las 35 giugaduras che la trenadra Pia Sundhage ha nominà en il camp da trenament daventi surtut era ina cumbat per persvader e conquistar in plaz en il cader definitiv.

Era sch'il plaschair è grond, da survegnir la schanza unica da pudair giugar ina giada in grond turnier en patria, avant ils agens fans, sa derasa era malsegirtad. Dacurt è la Svizra vegnida relegada da la liga A da la Nations League en la B. Uschia daventa la via al proxim campiunadi mundial, il 2027 en Brasilia, bler pli crappusa. I na marscha definitivamain betg sco giavischà. Vitiers vegn che la naziunala sto desister da sia attatgadra Ramona Bachmann pervia d'ina blessura dal schanugl. Gnanc in mais avant il cumenzament dal campiunadi a chasa ha ella rut il liom cruschà durant in trenament.

Ils stadions da l'EURO 2025

Dapi il fanadur 2024 spetgan las Svizras sin ina victoria en in gieu che quinta. Dapi otg gieus è la truppa da Pia Sundhage senza victoria. Ha incassà blers gols e sajettà be quatter. Senza success sa derasa automaticamain malsegirtad.

Ina da las grondas figuras dal ballape da dunnas en noss pajais è Ramona Bachmann. Ella è uss prest 20 onns profi. Cun 16 onns è ella stada l'emprima Svizra che ha survegnì in contract da profi en l'exteriur. Ella ha pudì festivar numerus success cun gronds clubs sco Paris St. Germain ubain Chelsea. Che Bachmann na vegn betg a cumbatter per victorias cun la naziunala è ina gronda schleppa per l'equipa.

Ed ella ha era fullà via per far pli simpel a la generaziun giuvna da giugaduras en il mund dal ballape da dunnas. Tar la furma momentana da la naziunala svizra, di l'attatgadra, ch'i pudess definitivamain ir meglier.

Tuttas stoppian analisar a moda critica. Ellas sco giugaduras, dentant era la trenadra e l'entira entourage. Communitgar avertamain ed era tadlar sin las giugaduras co ch'ellas resentan la situaziun e lur rolla sin il plaz. Qua haja la naziunala definitivamain potenzial da far meglier. E quai vegnian ins era a dumagnar durant las trais emnas che restian fin che l'aventura Euro cumenza.

L'urari fin a l'Euro

Or da l'archiv: