Il fanadur 2025 rolla la balla en ils stadions svizzers. Cun l'UEFA Women’s EURO 2025 vegn il pli grond eveniment da sport da dunnas en la Svizra. Ils 2 da fanadur giogan las Svizras l'emprim gieu en il «Joggeli» a Basilea.
Ina festa da ballape persistenta
La finamira dals organisaturs – l'Uniun svizra da ballape e l'UEFA – sajan stadions plains. Plinavant duai l'occurrenza avair in effect local, naziunal ed internaziunal. L'occurrenza duai gidar a promover il ballape sco sport preferì tar las dunnas. Ins spera cun quai er d'augmentar a lunga vista il dumber da ballapedistas licenzadas, sco er il dumber da squadras da dunnas e mattas en Svizra. Actualmain datti en Svizra var 300'000 persunas cun licenza da ballape – be 40'000 èn dunnas.
Avant spetgan dentant anc ils gieus da qualificaziun. Las emprimas partidas èn il cumenzament d'avrigl. En tut giogan 51 squadras da dunnas per la qualificaziun – plaz hai per 16. Sco ospitant dal campiunadi europeic 2025 è la naziunala svizra da las dunnas cun lur trenadra Pia Sundhage automaticamain qualifitgada per quest turnier. I daventa la terza participaziun en roda per las ballapedistas svizras.
En Svizra vegn giugà a Basilea, Berna, Genevra, Lucerna, Sion, Son Gagl, Thun ed a Turitg. Losanna è la finala sa retratg perquai ch’i vegn organisà là la stad 2025 la festa federala da gimnastica.