Siglir tar il cuntegn

Header

cuntegn

Fabian Ritzmann Dals «Ticino Rockets» al HCD

En la vegliadetgna da 19 onns ha Fabian Ritzmann da Scuol festivà sia premiera en la National League tar il HCD. L’attatgader ha gia pudair dar sis partidas cun il champiun da record.

audio
Fabian Ritzmann, dals Ticino Rockets tar il HCD
03:17 min, Actualitad dals 03.04.2021.
laschar ir. Durada: 03:17 minutas.

Pudair viver dal far sport: quai è il grond siemi da Fabian Ritzmann. Curt suenter il giarsunadi da commerzi para d’esser gartegià. Il giuven hockeyan da Scuol ha pudì suttascriver ses emprim contract da profi – quai gest cun ses patrun, il Club da hockey da Tavau. L’idea dals responsabels dal HCD èsi che Fabian Ritzmann cumenzass tar l’equipa partenaria, ils Ticino Rockets da Biasca, en la Swiss League. Da là davent avess el lura la schanza da magari era vegnir nominà ina u l’autra giada per il HCD.

Campiunadi cun Biasca, singuls gieus cun il HCD

La gronda part da las partidas da champiunadi ha Fabian Ritzmann dà cun ils Ticino Rockets – da curt era las duas partidas dals «pre-playoffs» encunter Visp. Ils Rockets han dentant pers la seria ed uschia è la stagiun ida a fin. Dapi lura metta il trenader Christian Wohlwend anc pli ferm sin il attatgader engiadinais. Wohlwend ha nominà Ritzmann gia sis giadas. L’emprim era el part dal quart bloc dal HCD. Durant l’ultima partida, quella da giubileum encunter ils ZSC Lions, ha Fabian Ritzmann pudì giugar en l’emprim bloc cun ils giugaders da classa Magnus Nygren e Fabrice Herzog.

«Igl è da nizzegiar la schanza»

La glista dals blessads tar il Club da hockey da Tavau è gia durant l’entira stagiun magari lunga. Era pervia da quai, è Fabian Ritzmann vegnì nominà per l’emprima equipa. Tuttina, sch’ins ha la schanza, ston ins era nizzegiar quella – e quai ha Ritzmann fatg.

En sia rolla sa sentia el adina meglier. El spera, sa chapescha, da pudair dar anc bleras partidas per il HCD. Forsa che ses viadi tar l’equipa da tradiziun cuntinuescha anc in zichel questa stagiun. «Il pli bel temp da l’entira stagiun», spetga anc sin il HCD. Per però esser da la partida en ils playoffs ha la squadra grischuna anc da prender l’obstachel dals pre–playoffs. Quels han lieu suenter Pasca.

RTR actualitad 17:00

Artitgels legids il pli savens

Scrollar a sanestra Scrollar a dretga