Pervia da la pandemia da corona ha la liga da hockey decis da midar in zichel il modus da qualificaziun per ils playoffs. Mo las emprimas sis equipas suenter la qualificaziun èn da la partida. Las squadras sin las plazzas set fin diesch cumbattan en ina seria da maximalmain trais partidas per las davosas duas plazzas da playoff.
HCD pli probabel encunter il SC Berna
L’equipa da la chapitala federala è puspè en quarantina. Perquai na dat il HCD betg la davosa partida da qualificaziun encunter Berna. Il HCD s’entaupa pir a partir da l’emna proxima cun il SC Berna – lura dentant en ils «pre-playoffs». Sche gie ch’i dat anc ina pitschna schanza per Rapperswil-Jona da far il pass avant Berna en la tabella n’è quai betg uschè probabel. Rapperswil avess da gudagnar las davosas duas partidas da qualificaziun encunter Lugano e Losanna per vegnir anc sin plazza nov da la tabella.
