Armon Orlik valeva sco favurit. Dal 2016 fin 2019 ha el gudagnà mintg'onn la festa chantunala da lutga grischun-glarunaisa. Quest onn n'èsi dentant betg gartegià da defender ses titel. Il lutgader da Maiavilla sa tschenta a la fin sin il segund rang – quai cun total 57,25 puncts suenter quatter victorias e dus paris. El sa mussa cuntent cun sia prestaziun, sco ch'el ha ditg envers RTR.
La prestaziun è stada buna. Il mument n'è dapli betg stà pussibel. [...] Jau hai er savì ch'i spetgan intgins adversaris difficils.
Gudagnà la festa da lutga ha Samir Leuppi da Winterthur. En la lutga finala metta el en il resgim a Roman Hochholdinger da Favugn. El è a la fin sin il terz plaz (57,00 puncts). Sin il segund rang – ensemen cun Armon Orlik – sa tschentan er anc Sandro Schlegel da Fideris e Fabio Castelli dad Andeer (57,25 puncts).
Tut ils resultats
Emprima festa da lutga senza limita da persunas
Var 800 aspectaturs ed aspectaturas han chattà la via fin en la Val Sertig. Igl è stà l'emprima festa da lutga senza limita da persunas. In obligatori da mascras n'hai betg dà. Tgi che vuleva esser da la partida stueva mussar in certificat da Covid. Ils organisaturs han dentant appellà da tegnair en las mesiras d'igiena generalas.
