Festa grischuna-glarunaisa - Curdin Orlik triumfescha a Domat

Betg Armon, mabain ses frar Curdin Orlik ha gudagnà la festa da lutga grischuna-glarunaisa a Domat. Il lutgader da 32 onns che cumbatta per la federaziun bernaisa ha mussà ina festa quasi perfetga. Suenter il pari en l'emprima lutga ha el battì tschintg adversaris en seria. En la lutga finala ha el lura mess en dies Christian Biäsch da Tavau. Per el saja in siemi ì en vigur. El haja adina vulì triumfar a questa festa grischuna-glarunaisa che haja era per el sco Grischun ina gronda muntada, uschia Curdin Orlik curt suenter ses success a Domat.

Rangaziun Festa da lutga grischuna-glarunaisa 2025 a Domat

Victoria dubla per ils Bernais

Davos Curdin Orlik è classà Adrian Walther, in ulteriur giast dal chantun Berna. Walther che vala ensemen cun Armon Orlik sco in dals gronds favurits ha la finala in mez punct pli pauc sin ses conto che Curdin Orlik. Armon Orlik ha dà or da maun in sisavel triumf a quella festa cun in pari en la tschintgavla lutga encunter Christian Schuler. La finala terminescha Armon Orlik la festa sin il terz plaz, 1,25 puncts davos ses frar Curdin. Ils Orliks han pia persvadì e mussà che la furma constat, er en vista al punct culminant da la stagiun, la festa federala la fin avust a Mollis en il chantun Glaruna.

Cranz per Marc Jörger da Domat

Ina buna prestaziun ha era mussà Marc Jörger da Domat. Il president dal Club da lutga Domat/Ems ch'ha organisà questa festa grischuna-glarunaisa ha gudagnà quatter da sis lutgas uschia ch'el po turnar a chasa cun in cranz, ses emprim en questa stagiun.

Cun questa prestaziun po el salvar la schanza da dastgar sa participar a la festa federala. Betg ì sco giavischà èsi perencunter al frar Corsin Jörger. El ha pers quatter da sis lutgas e n'ha uschia gì nagina schanza da gudagnar in cranz.

In emprim cranz insumma hai dà per Elia Mayer dal Partenz. Plinavant ha anc in ulteriur lutgader grischun gudagnà quest cranz che mo ils megliers 20 da 123 lutgaders han survegnì, numnadamain Niklas Lötscher da Vaz Sut.

La festa da lutga grischuna-glarunaisa a carmalà quest onn radund 2'600 visitadras e visitaders sin l'areal da festa a Domat.

5. lutga: Armon Orlik vegn franà suenter gentar

Armon Orlik ch’ha gia gudagnà tschintg giadas la festa grischuna-glarunaisa è vegnì franà en la tschintgavla lutga. Encunter Christian Schuler ha il favurit stuì sa cuntentar be cun in pari. Perencunter marscha ses frar Curdin Orlik da victoria a victoria ed è sin buna via da cuntanscher la lutga finala a Domat.

Er Marc Jörger ha persvadì suenter la pausa da mezdi e festivà sia quarta victoria. Stuì magunar la terza terrada ha perencunter Corsin Jörger uschia ch'el na vegn er betg da prender a chasa in cranz.

4. lutga: Armon e Curdin Orlik a la testa dal classament

Ils frars Orlik e Jörger han laschà ora cups avant gentar. Tant Armon e Curdin Orlik sco era Marc e Corsin Jörger han uschia merità la pausa da mezdi. Tuts quatter han gudagnà la quarta e davosa lutga avant gentar. Ils dus Orlik’s èn uschia vinavant sin fitg buna via da triumfar a Domat. Omadus han gudagnà trais da quatter lutgas ed ina giada cumbattì pari. Era Marc Jörger ha gudagnà trais lutgas. Ina gia è el dentant vegnì bittà en dies en il resgim. Per Corsin Jörger sto perencunter ir tut optimal il suentermezdi per turnar a chasa cun in cranz. El ha pers duas da quatter lutgas fin mezdi.

3. lutga: Per ils Orlik's va tut tenor plan

Armon e Curdin Orlik pon laschar nudar la proxima nota 10. En la terza lutga han ils dus lutgaders grischuns mintgamai gudagnà lur cumbats suenter curt temp. Armon ha battì Christian Pianta e Curdin ha mess en il resgim Kjetil Fausch.

In’ulteriura victoria, la segunda l’avantmezdi, hai dà per Marc Jörger ch’è uschia sin buna via da gudagnar ses emprim cranz en questa stagiun. El ha battì il Glarunais Tobias Fässler. Betg sco giavischà vai a Corsin Jörger ch’ha pers encunter Karim Leuppi da Winterthur. Per Jörger gia la segunda terrada.

2. lutga: Armon e Curdin Orlik fan curt process

Suenter ina partenza plitost controllada la damaun en l’emprim cumbat han ils frars Orlik gudagnà suveran la segunda lutga. Armon ha mess en dies spectacular l’Appenzellais Livio Büchler e Curdin n’ha laschà nagina schanza a Rico Ackermann, in ulteriur lutgader appenzellais.

Marc Jörger da Domat sto suenter sia victoria magunà l’emprima terrada a la festa da chasa. Il president dal Club da lutga Domat/Ems ha pers encunter Christian Schuler, in dals pli rutinads lutgaders insumma cun gia 120 cranzs. Perencunter ha il frar Corsin Jörger gudagnà sia emprima lutga, quai encunter Ruedi Brander dal chantun Son Gagl.

1. lutga: Ils Orlik’s ston parter ils puncts

Tant Armon sco er ses frar Curdin Orlik han stuì sa cuntentar cun in pari en l’emprima lutga a la festa grischuna-glarunaisa a Domat, Armon Orlik encunter il Bernais ed ulteriur grond favurit Adrian Walther e Curdin Orlik encunter Martin Roth.

Ils dus lutgaders indigens, ils frars Marc e Corsin Jörger han cumenzà fitg different lur festa da chasa. Durant che Marc ha gudagnà ses emprim cumbat encunter Thomas Wild, quai suenter be paucas secundas, è Corsin vegnì bittà en dies en il resgim, quai da Jonas Lenherr.

PREVISTA Festa da lutga grischuna-glarunaisa a Domat

La festa da lutga chantunala 2025 vegn organisada dal Club da lutga Domat/Ems che festivescha il giubileum da 105 onns.

La sonda, ils 14-06-25 è vegnì organisà sin il medem areal la festa da lutga per ils passa 200 megliers giuvenils dal nordost da la Svizra. La dumengia, ils 15-06-25 cumbattan radund 130 lutgaders activs per il titel e tschupels. I vegn spetgà a Domat enturn 3’500 visitadras e visitaders, tranter quels er blera prominenza ord la politica, l’economia ed il sport.

Blera lavur preparativa

Gia dapi in’emna è il Club da lutga Domat/Ems cun agid da voluntaris ed il schurmetg civil vid las preparativas per questa festa ch’ha lieu sin la plazza Vial dasper las plazzas da ballape e visavi la plazza da golf. La mesemna èn vegnidas construidas trais tribunas e la gievgia è vegnì repartì bun 130 cubics resgim sin sis differents rintgs. Per la festa dals giuvenils vegn duvrà tut ils rintgs, per la festa principala dals activs alura be quatter rintgs ch’han in diameter da 12 meters.

I vegn lavurà ti mordio a Domat – impressiuns

Marc e Corsin Jörger activs en e dasper il resgim

Prendì martè, pala e rastè enta maun han quels dis er ils dus lutgaders activs dal Club da lutga Domat/Ems, ils dus frars Marc e Corsin Jörger. Marc (30 onns) è il president dal club e Corsin (32) il manader tecnic. Omadus sa legran sin la festa tar els a chasa. La finamira saja da gudagnar in cranz, i fiss l’emprim en questa stagiun ed in impurtant success per salvar la schanza d’era dastgar sa participar al punct culminant da l’onn, la festa federala la fin avust a Mollis en il chantun Glaruna.

Armon Orlik frunta sin gronda concurrenza

La glista dals participants a la festa grischuna-glarunaisa empermetta grond sport da lutga. Dasper ils megliers lutgaders da la regiun pon ils organisaturs er beneventà divers lutgaders ospitants dals chantuns Berna e Sviz. Il grond star ed in dals gronds favurits è Armon Orlik ch’ha triumfà la fin d’emna passada a la festa glarunaisa-grischuna a Ziegelbrücke, quai ensemen cun Samuel Giger. Orlik aveva gia gudagnà il matg las duas festas chantunalas da Turitg e Turgovia. Er a la festa da lutga il favrer a Vaz Sut e l’avrigl a Cazas n’è il lutgader da 30 onns betg stà da franar.

Glista dals victurs dapi il 1913

A Domat survegn Armon Orlik, ch’ha gia gudagnà tschintg giadas questa festa grischuna-glarunaisa, cunzunt concurrenza da ses frar Curdin Orlik, dal Bernais Adrian Walther, da Fabian Kindlimann dal chantun Turitg e dals dus lutgaders da la Svizra Centrala, Alex e Christian Schuler. Dal Grischun èn annunziads bun 25 lutgaders.

En l'emprima lutga gia la damaun baud frunta Armon Orlik sin Adrian Walther. Curdin Orlik va la damaun en il resgim encunter Martin Roth da Herisau e Christian Biäsch da Tavau cumbatta encunter Christian Schuler da Nossadunaun.

Festa da lutga grischuna-glarunaisa 2025