A Silvaplauna è Andri Ragettli l'emprima giada sisum il podest questa stagiun – e quai senza cursa. Perquai che la concurrenza slopestyle n'ha betg gì lieu dumengia pervi da l'aura ed il vent, han valì ils resultats da la qualificaziun. Uschia ha gudagnà Andri Ragettli avant l'Austriac Lukas Müllauer e Luca Harrington da la Nova Zelanda. Ragettli è uschia era sin plaz 3 dal classament da disciplina.
Il giuven da 25 onns oriund Flem aveva era festivà avant otg onns sia emprima victoria en la cuppa mundiala a Silvaplauna, nua ch'han lieu en in onn ils campiunadis mundials 2025. Mo ina da questas tozzels victorias è reussì ad el en il Big Air. Ragettli preferescha il slopestyle. En quella sparta è el daventà campiun mundial il 2021 ed avant in onn a Bakuriani terz dal campiunadi mundial.
Tar las dunnas ha concludì la Svizra Mathilde Germaud la stagiun sin plaz dus davos la Franzosa Tess Ledeux. Gia avant era però cler ch'ella ha gudagnà tut las trais cullas da cristal: la gronda dal classament general e las duas pitschnas per las disciplinas en il Big Air e slopestyle.
