Cun ina demonstraziun da gala ha Rafael Nadal gudagnà ses 14avel titel al French Open a Paris.En il final n'ha il Spagnol laschà nagina schanza a ses concurrent – il norvegiais Casper Ruud – ed ha gudagnà la partida cun 6:3, 6:3 e 6:0. Sin via al titel aveva Nadal tranter auter eliminà en il quartfinal il numer 1 dal mund, il Serb Novak Djokovic ed en il mezfinal il Tudestg Alexander Zverev ch'ha stuì dar si pervia d'ina blessura a la fin dal segund set.
Rafael Nadal ha uss gudagnà 22 titels da Grand Slam – dus dapli che Novak Djokovic e Roger Federer. Gia l'emprim turnier da Grand Slam da l'onn, l'Australian Open, aveva Nadal gudagnà en il final encunter il Russ Daniil Medewedew. Il proxim turnier da Grand Slam è a Wimbledon nua che Djokovic parta sco favurit e defensur dal titel.
