168 atletas ed atlets vegnan a represchentar la Svizra als gieus olimpics d’enviern a Peking che cumenzan ils 4 da favrer. Quai èn trais atlets pli pauc ch’avant quatter onns a Pyeongchang.
La selecziun definitiva
Suenter la nominaziun dad ulteriuras 40 atletas ed atlets, ha Swiss Olympic inoltrà la selecziun definitiva per ils gieus olimpics da quest onn. 75 atletas e 93 atlets svizzers dastgan far il viadi a Peking. Tranter auter er las duas biatletas grischunas Selina Gasparin ed Irène Cadurisch. Ellas vegnian a sa participar a la cursa da staffetta. Nagin ticket per Peking datti percunter per las duas soras Elisa ed Aita Gasparin, sco er per il skiunz rumantsch Sandro Simonet.
Ulteriuras Grischunas e Grischuns
Ir a chatscha da medaglias en il ski alpin dastga ord vista grischuna Gino Caviezel, Stefan Rogentin e Jasmin Flury. Tar il passlung èn nominads dasper il leader Dario Cologna Jason Rüesch ed Alina Meier, omadus da Tavau.
Finamiras da la squadra svizra
La finamira da Swiss Olympic è, tenor il Chef de Mission Ralph Stöckli, da turnar a chasa cun tantas medaglias sco avant quatter onns. A Pyeongchang avevan ils Svizzers gudagnà 15 medaglias, 5 dad aur. Las emprimas atletas ed atlets svizzers partan lura mesemna en direcziun da Peking.
