Siglir tar il cuntegn

Header

Legenda: Ils passlungists lantschan la nova stagiun a Ruka en Finlanda. Keystone
cuntegn

Stagiun d’enviern 2021/22 Gieus olimpics a Peking en il focus

La preparaziun sin la nova stagiun è a fin – uss vai liber. Passlunghistas e biatlets lantschan la fin d’emna la nova stagiun da la cuppa mundiala ed er ils skiunzs da las disciplinas spertas vegnan l’emprima giada en acziun.

Suenter in onn interrupziun pervia da la pandemia da corona èn skiunzas e skiunzs enavos en l’America dal Nord. A Lake Louise en il Canada stattan sin il program ils proxims dis duas cursas rapidas ed in super-g dals umens. Ord vista svizra èn Beat Feuz e Marco Odermatt ils gronds trumfs. Odermatt è la chatscha da puncts per il classament general da la cuppa mundiala e Feuz emprova da gudagnar la proxima stagiun sia 5avla culla da cristal en la disciplina cursa rapida. Betg a la partenza èn tranter auter Carlo Janka e Mauro Caviezel, ils dus Grischuns ch’han stuì star a chasa pervia da blessuras. Las dunnas èn la proxima fin d’emna a Killington avant che far il viadi a Lake Louise.

audio
Beat Feuz avant la stagiun
02:29 min, RTR Audio dals 25.11.2021.
laschar ir. Durada: 02:29 minutas.

Dario Cologna – tgi auter

Passlunghistas e passlunghists da la cuppa mundiala lantschan la nova stagiun olimpica a Ruka en la regiun da Kuusamo en Finlanda. La gronda speranza svizra è ina gia dapli Dario Cologna che parta en sia davosa stagiun da la carriera. Malgrà ina blessura vid in pe è il Jauer pront per las emprimas cursas, quai ha el mussà cun dus buns resultats en duas cursas da test la davosa fin d’emna a Norvegia ed en Svezia. Schanzas sin in podest vegni er a dar per Nadine Fähndrich e Laurien van der Graaff, quai principalmain en las disciplinas da sprint.

audio
Nordic ed alpin: Situaziun avant stagiun «olimpica»
07:26 min, Actualitad dals 25.11.2021.
laschar ir. Durada: 07:26 minutas.

Speranza sin in u l’auter exploit

Sco tar ils passlunghists èsi er da sperar sin in u l’auter exploit tar las biatletas ed ils biatlets che cumenzan la nova stagiun ad Östersund en Svezia. Il leader svizzer è Benjamin Weger. Sper il Vallesan vulan principalmain las dunnas procurar per in u l’auter success, gugent er en las cursas da staffetta. E gartegi da sajettar bain ed esser spert sin loipa è bler pussibel. Betg a la partenza ad Östersund è Irene Cadurisch, percunter il trio cun las trais soras Selina, Elisa ed Aita Gasparin.

Actualitad 08:00

Artitgels legids il pli savens

Scrollar a sanestra Scrollar a dretga