Il glindesdi èn vegnids nominads atletas ed atlets d’atletica leva. Tranter quels van er dus Grischuns a la chatscha da medaglias, ina giada Annik Kälin da Grüsch en il heptatlon e William Reais da Cuira en il sprint da 200 meters. Il terz Grischun a Paris è il mountainbiker Nino Schurter, il campiun olimpic dal 2016 a Rio che vul gudagnar en la cursa da cross country sia quarta medaglia olimpica.
En tut èn ulteriurs 30 Svizzers e Svizras da l'atletica leva vegnids nominads il glindesdi. Tranter auter tuts e tuttas ch'han fatg medaglias a Roma als campiunadis europeics quest onn – Mujinga Kambundji, Ditaji Kambundji, Angelica Moser, Simon Ehammer, Timothé Mumenthaler e Jason Joseph.
-
Bild 1 von 3. William Reais, sprint 200 meters. Bildquelle: Keystone.
-
Bild 2 von 3. Annik Kälin, heptatlon. Bildquelle: Keystone.
-
Bild 3 von 3. Nino Schurter, mountainbike cross country. Bildquelle: Keystone.
La finamira da medaglias s'orientescha a Rio 2016
Concernent las finamiras da medaglias è il manader da la delegaziun Ralph Stöckli sa mussà in zic pli retegnì ch'en il passà. «Medaglias e diploms èn anc adina la gronda finamira per bleras da nossas atletas e da noss atlets, da federaziuns e da Swiss Olympic», ha el ditg. «Nus vulain però esser realistics: En media dals davos gieus da stad dapi il 1972 ha la Svizra gudagnà tschintg medaglias e mai cuntanschì dapli che 9 medaglias. Las 13 medaglias da Tokio stuain nus damai classifitgar endretg. Jau pens che nus pudain s'orientar als gieus da stad 2016. Er quels gieus han gì grond success.» Lezza giada a Rio de Janeiro avevan las atletas ed ils atlets svizzers gudagnà 7 medaglias e 18 diploms.
Ils gieus olimpics en la chapitala franzosa cumenzan ils 26 da fanadur e cuzzan duas emnas, fin ils 11 d’avust. Igl èn ils terzs gieus olimpics da stad a Paris suenter il 1900 ed il 1924.