Las partidas encunter il leader da la liga naziunala èn adina spezialas. Las aspectativas a quest duel èn adina grondas. Ed il HCD ha questa giada accumplì las aspectativas. La basa per la clera victoria encunter il EHC Bienna ha Tavau mess gia baud. Gia suenter l’emprim terz manava l’equipa grischuna cun 2:0. Il segund terz è alura stà la gala dal HCD encunter l’equipa bernaisa. Tranter la 24avla e la 25avla minuta ha il HCD realisà in culp dubel ed augmentà il resultat intermediar sin 4:0. Quai è stà il punct nua ch'il trenader da Bienna Antti Törmänen ha remplazzà il goli Joren van Pottelberghe tras Elien Paupe. Quel ha lura dà in zichel dapli segirtad a sia equipa.
Fasa da squitsch e Sandro Aeschlimann cun stupentas paradas
Il midament dals golis ha procurà tar Bienna per ina reacziun. Suenter la midada ha il leader numnadamain gì sia meglra fasa. Numerusas giadas han ils attatgaders da Bienna tratg sin Sandro Aeschlimann en il gol da Tavau. Aeschlimann ha dentant parà tut ils sajets. En questa fasa da la partida è el stà la paraid en il gol da Tavau. Sia segirezza davostiers ha gì in'influenza sin l’entira equipa. Suenter questa fasa da squitsch da Bienna è il HCD turnà en il vegl muster. Il HCD ha cuntinuà da sajettar gols. En l'ultim terz en vegnids vitiers anc ina giada quatter gols, uschia ch'il campiun da record ha tramess a chasa il leader da Bienna cun in detg pachet.
Las ulteriuras partidas
- Ambri – Ajoie 3:2 suenter prolungaziun
- Friburg – Zug 4:5 suenter prolungaziun
- Losanna – Lakers 2:5
- Lugano – Genevra 1:4
Del Curto commember d'honur
Il trenader legendar Arno Del Curto è vegnì undrà sco commember d'honur. Quai ha la radunanza generala decidì sonda suentermezdi. Del Curto sez n'è betg stà preschent. Sut Del Curto ha il HCD cuntanschì sis titels da campiun svizzer. El è stà en tut 22 onns headcoach da Tavau.
