Siglir tar il cuntegn

Header

cuntegn

HCD vs. Langnau Clera sconfitta da 1:6 per il HCD cunter Langnau

In terz ha bastà a Langnau per decider il gieu cunter il HCD. Ditg n’aveva quai dà nagins gols, en il terz d’amez ha Langnau lura dentant fatg tschintg gols. Cler ch'il gieu era alura decidì.

Gia duas giadas han il Club da hockey da Tavau e Langnau dà durant questa stagiun in encunter l’auter. Duas giadas era quest duel adina fitg stretg. Mo in gol ha mintgamai decidì il gieu. Betg uschia il terz duel tranter il HCD e Langnau. En l’emprim terz n’ha quai da nagins gols. A partir da la trentavla minuta è alura vegnida la ‘show’ da Langnau. Duas giadas Jesper Olofsson aifer da duas minutas. Ed alura anc ina giada trais gols aifer da trais minutas e mez, tuts gols da powerplay, han decidì il gieu. Il HCD ha stuì magunar minutas nua ch'i grategiava tut a Langnau e nua che l’equipa grischuna n’ha simplamain betg chattà or dal dilemma.

Enzo Corvi disfortunà sin il banc da chastids

Perquai che l’attatgader dal HCD ha survegnì in chasti da tschintg minutas per in'acziun encunter il goli da Langnau ha quel stuì mirar tiers sin il banc da chastids sco che Langnau ha prendì dapart il HCD. Gia tar l’emprim gol da Langnau seseva Enzo Corvi sin il banc da chastids. Pelvair dir esì lura vegnì tar il chasti da tschintg minutas nua che Langnau ha fatg anc ina giada trais gols. Perquai ch'il chasti era in da tschintg minutas na ha Corvi betg pudì turnar sin il glatsch durant l’entir temp da ses chasti.

Gnanca in zichel cosmetica durant las ultimas 20 minutas

Tge dir sco trenader a l’equipa suenter uschia in terz nua ch'il HCD ha survegnì gest tschintg gols? Ils fans dal HCD han sperà invan ch'il trenader Christian Wohlwend avess anc pudì dar in impuls a sia equipa e che quella vess anc mussà almain in zichel ina reacziun. Langnau ha perfin fatg il 0:6, pir duas minutas avant la fin ha Axel Simic anc pudì far il gol d’onur. Per dapli na ha quai dentant betg tanschì.

audio
Thomas Wellinger suenter la sconfitta
00:16 min, RTR Audio dals 01.12.2021.
laschar ir. Durada: 00:16 minutas.

RTR novitads 20:00

Artitgels legids il pli savens

Scrollar a sanestra Scrollar a dretga