Avant ina fitg bella culissa da var 6'500 persunas n'hai dà nagut da festivar per il Club da hockey da Tavau. Quai malgrà ch'ils Grischuns èn partids optimal en la partida. Raphael Prassl ha sajettà en la 7avla minuta en avantatg Tavau. Ils Turitgais han dentant anc pudì egualisar en l'emprim terz entras Justin Azevedo.
Pli ditg ch'il gieu ha cuzzà e pli bler fadia ch'il HCD ha gì cunter ils Lions. Uschia èsi mo stà logic che Chris Baltisberger e Denis Hollenstein han sajettà en avantatg ils osps en il segund terz. Er en l'ultim terz n'ha l'equipa da Christian Wohlwend betg chattà in recept cunter la buna defensiun turitgaisa. Cun chastis en las ultimas minutas dal gieu n'hai era betg dà ina gronda offensiva da finiziun da Tavau. Juho Lammikko ha paucas secundas avant la fin tutgà il gol dal HCD per il resultat final da 1:4.
Malgrà questa terrada resta il Club da hockey da Tavau sin plazza quatter da la tabella. Suenter bun la mesadad dal campiunadi (27 da 52 gieus èn giugads) è l'equipa pia da chattar sin ina plazza da playoff, quai ch'è era la gronda finamira.
