La partenza en il gieu cunter Ambri-Piotta è ida bravamain en las chautschas al Club da hockey da Tavau. Gia suenter set minutas manava l’equipa da la Leventina cun 2:0. Il segund gol per Ambri ha Dario Bürgler sajettà, el ch’ha giugà tranter il 2007 ed il 2014 a Tavau e ch’è vegnì duas giadas campiun svizzer cun il HCD.
En il segund terz ha il HCD pudì mussar ina reacziun, l’emprim entras il chapitani Andres Ambühl e lura entras il topscorer Mathias Bromé ch’han pudì egualisar il gieu al 2:2 enfin la 28avla minuta. Er en il davos terz è Tavau stà l’equipa activa e cun gols da Dennis Rasmussen ed Enzo Corvi pudì ir en avantatg cun 4:2. Il topscorer Mathias Bromé ha lura decidì il gieu cun ses segund gol al 5:2 en la 56avla, quai entras in penalti. Il davos gol d’Ambri-Piotta entras Isacco Dotti en la davosa minuta ha sulettamain midà in zic cosmetica. Per il HCD èsi stà la terza victoria en il quart gieu da chasa en questa stagiun. Per Ambri èsi da l’auter maun stà la quarta terrada en seria.
Grazia a questa victoria encunter Ambri-Piotta ha il HCD pudì far in pass enavant en la tabella. Ils Grischuns sa chattan da nov sin il 6avel plaz cun 13 puncts ord 7 gieus. A la testa resta l’EHC Bienna cun 22 puncts ord 9 gieus.
