Siglir tar il cuntegn

Header

cuntegn

Hockey NL HCD gudogna danovamain cunter ils Lakers

Il Club da hockey da Tavau ha er gudagnà il 6avel duel cun ils Rapperswil-Jona Lakers en questa stagiun. Il HCD ha battì a chasa l’equipa dal chantun Son Gagl piz a cup cun 3:2 suenter sajettar penaltis.

L’emprima duscha fraida per ils Lakers hai gia dà suenter 52 secundas. Cun l’emprima buna acziun dal gieu ha il topscorer dal HCD, Enzo Corvi, manà sia equipa cun 1:0 en avantatg. Ils Lakers han dentant pront pudì mussar ina reacziun ed egualisà il gieu al 1:1 en la terza minuta. 10 minutas pli tard han ils Lakers pudì ir l’emprima e suletta giada en avantatg. Ma questa giada hai schizunt cuzzà be bun ina minuta fin ch’il HCD ha pudì egualisar al 2:2 entras Teemu Turunen. Tar tut quels quatter gols n’han ils golis però betg fatg la meglra figura.

Penaltis suverans dal HCD

Durant ch’ils Lakers han lura gì dapli dal gieu en il segund terz ha Tavau persvadì dapli en il davos terz. Gols n’hai dentant dà nagins, er betg durant la prolungaziun da 5 minutas. La finala ha la lutga da penaltis stuì decider. En quella n’han ils attatgaders dal HCD laschà nagina schanza al goli dals Lakers, Noël Badel. Tant Aaron Palushaj sco er Teemu Turunen, Andres Ambühl ed Enzo Corvi han tuc il gol ed uschia procurà ch’il HCD gudogna almain dus puncts en quest duel cun ils Lakers.

audio
L'attatgader Marc Aeschlimann davart il gieu
00:20 min, Novitads dals 13.03.2021.
laschar ir. Durada: 00:20 minutas.

En la tabella sa chatta il HCD da nov sin il 7avel plaz. Il proxim gieu dat l'equipa da Tavau mardi proxim, ils 16 da mars, ordaifer encunter Losanna.

RTR novitads 20:00

Artitgels legids il pli savens

Scrollar a sanestra Scrollar a dretga