Ils fans han stuì spetgar fin la 24avla minuta sin l’emprim gol. Lura ha Dominik Egli tuc al 1:0. Al cumenzament dal davos terz ha il topscorer dal HCD, Mathias Bromé, nizzegià suveran in penalti al 2:0. Bun quatter minutas avant la fin ha Losanna anc pudì scursanir al 1:2 entras Tim Bozon, per dapli n’hai dentant betg pli tanschì. Anzi, be paucas secundas pli tard ha Yannick Frehner nizzegià in conter sco ord il cudesch al 3:1 ed en la 58avla minuta ha Raphael Prassl tuc en il gol vit al 4:1 ed uschia fatg tut cler avant il bun 3’300 fans. Per Tavau èsi stà la 10avla victoria en ils davos 11 gieus da campiunadi.
Discletg per Knak e Nussbaumer
Suenter bun la mesadad dal gieu ha il HCD però pers Simon Knak ch’ha survegnì in puck frontal en fatscha, e quai suenter in sajet da ses collega d’equipa Lukas Stoop. Knak è gist quai giugader ch’ha remplazzà en quest gieu Valentin Nussbaumer che croda ora tranter trais e quatter mais. Nussbaumer ch’ha midà quest onn tar il HCD sto danovamain laschar operar ses maun ch’el veva gia blessà la fin da la stagiun passada. Per l’attatgader da 21 onns ina dira frida. Avant paucs dis aveva Patrick Fischer numnadamain er nominà Nussbaumer en il cader naziunal per la Cuppa da la Germania che cumenza gievgia proxima a Krefeld. A quai turnier frunta la Svizra sin la Slovachia (11-11), la Germania (13-11) e la Russia (14-11).
En 24 uras spetga Ambri-Piotta
Il HCD ha uss 24 uras peda da sa revegnir. La sonda saira a las 19:45 uras frunta Tavau ordaifer sin il HC Ambri-Piotta. L’equipa da la Leventina n’ha betg giugà il venderdi saira e po uschia ir plain forzas en quest gieu. Il sulet duel cun Ambri en questa stagiun veva il HCD gudagnà la fin settember a chasa cun 5:3.
