Cumenzà ha il gieu optimal per l’equipa da chasa. Gia en la 6avla minuta ha Marc Wieser manà il HCD cun 1:0 en avantatg. Exact tschintg minutas pli tard ha Romain Löffel pudì egualisar per ils Bernais, quai en powerplay suenter in chasti da duas minutas cunter Dominik Egli. En quest emprim terz ha il classicher tegnì quai ch’el ha empermess. Dus gols, chastis, bler tempo, bleras schanzas da gol e bleras emoziuns.
A partir dal segund terz ha il duel tranter dus dals gronds rivals en la National League pers vid la qualitad. Restà è sulet la tensiun, las emoziuns, ma er bleras discussiuns. Il sulet gol en il segund terz ha sajettà il giugader naziunal Tristan Scherwey al 2:1 per il SC Berna, quai en la 29avla minuta.
Ina fin dramatica
Al cumenzament dal davos terz ha il Canadais Cody Goloubef sajettà Berna cun 3:1 en avantatg. Il HCD n’ha dentant anc ina giada mobilisà las davosas forzas e pudì egualisar il gieu en las davosas minutas, minutas dramaticas. En la 58avla minuta ha Matej Stransky scursanì en powerplay al 2:3 ed en la 59avla minuta ha Magnus Nygren sfurzà cun il 3:3 il gieu en la prolungaziun. Quella ha però cuzzà be 29 secundas fin che Christopher DiDomenico ha procurà per la decisiun cun ses 4:3 per l'equipa da la chapitala svizra. Quest gol decisiv vegn però franc anc a procurar per in u l'autra discussiun en la garderoba dal HCD. Il trenader Christian Wohlwend ha numnadamain remplazzà il goli cun in ulteriur giugader per che Tavau possia lantschar in conter cun 4 encunter 3. Quai è dentant ir pulit en las chautschas. Il HCD perda numnadamain il puck e DiDomenico ha uschia pudì spedir il puck en il gol vit.
Uschia perda il HCD suenter la terrada dal venderdi saira ordaifer encunter ils Lakers (2:3 suenter penaltis) er a chasa encunter Berna be piz a cup. Malgrà questa terrada resta il HCD sin il quart plaz da la tabella, uss cun tuttina blers puncts sco Berna ch’ha pudì festivar la 5avla victoria en seria. Mardi proxim frunta Tavau ordaifer sin il EHC Bienna.
Fans cun coreografia magnifica
Avant il gieu tranter il HCD ed il SCB ha la gruppa da fans dal HCD «Sektor 1921» organisà ina grondiusa coreografia, quai a favur dal giubileum da 100 onns HCD ch’il club ha festivà la stagiun passada. Pervia da corona n’eri betg stà pussibel da metter sin pes questa coreografia. Cun in onn retard èsi dentant reussì als fans dal HCD da preschentar ina culissa magnifica. Tut ils fans en il stadion, cun excepziun dals fans da Berna, han survegnì in t-shirt mellen. Plinavant è vegnì preschentà placats e tailas ch’han tranter auter mussà in zic l’istorgia dal club, ils gronds success e las persunas principalas dals davos 100 onns HCD.
