In culp dubel aifer 18 secundas da Gregory Hofmann e Carl Klingberg suenter 49 minutas al 3:1 ha fullà la via a la victoria. L'EVZ terminescha uschia ina fitg buna stagiun cun ses segund titel da campiun svizzer suenter il 1998.
Sisavel titel per Genoni
Per il goli da Zug, Leonardo Genoni è quai gia il sisavel titel da campiun svizzer. El ha fin uss gudagnà mintga giada, sch'el ha cuntanschì il final dals playoffs. Genoni è stà trais giadas campiun svizzer cun il HCD, duas giadas cun il SC Berna ed uss per l'emprima giada cun l'EV Zug.
Blessads suenter la festa
Radund 5'000 persunas èn sa radunadas spontan Zug per festivar il titel da campiun svizzer dal EVZ. Tar las festivitads sin il plaz Arena èn 4 persunas sa blessadas. I ha er dà singulas dispitas. Sco quai che la polizia da Zug ha communitgà haja la sanitad stuì tractar 3 persunas ch'èn sa tagliadas.
Las blessuras n'haja dentant betg dà tar dispitas. Ina quarta persuna saja ida sezza en l'ospital suenter ch'ella era sa blessada entras material pirotecnic. Suenter la preschentaziun dal buccal saja la plazza sa svidada sveltamain.