Suenter ch’igl è vegnì enconuschent glindesdi che Patrick Fischer aveva duvrà il 2022 in certificat da Covid sfalsifitgà per pudair ir als gieus olimpics 2022, hai spert dà critica. Il squitsch da las medias, dals sponsurs e d’organisaziuns sco Swiss Olympic è daventà pli e pli grond. Suenter in emprim sustegn public ha la Federaziun svizra da hockey midà sia tenuta ed ha la finala relaschà Fischer sco trenader naziunal.
In'era plain success
Cun quella decisiun finescha ina lunga era en il hockey svizzer. Dapi sia nominaziun sco trenader naziunal avant var 10 onns ha Fischer furmà l'equipa e menà ella a gronds success. Tranter auter ha la Svizra gudignà trais gadas la medaglia d’argient als campiunadis mundials ed ei sa stabilida tranter las meglras naziuns dal hockey sin glatsch. Per il titel da campiun mundial, ch'era adina la gronda finamira, hai dentant mai tanschì.
Per la squadra naziunala è quella midada dentant ina gronda sfida. Blers giugadurs avevan ina buna relaziun cun Fischer. El ha adina guardà ch'ils giugaders da la NHL vegnan a dar cun la la naziunala il campiunadi mundial, suenter la fin da la stagiun. Il nov trenader Jan Cadieux surpiglia ussa il post pli baud che planisà. Sco assistent da Fischer enconuscha el bain l’equipa, dentant stat el ussa directamain en il center da l’attenziun.
Midada radicala curt avant il campiunadi mundial
Ord vista sportiva è la situaziun er delicata, perquai ch'il campiunadi mundial 2026 cumenza gia en in mais en Svizra. Il turnier a chasa duess vegnir ina gronda festa dal hockey. La causa Fischer è uss dentant sco ina duscha fraida per l’euforia. Ussa vegn a sa mussar, co l’equipa ed ils fans reageschan.
Il campiunadi mundial en Svizra ha lieu a Turitg e Fribourg, cumenza ils 15 da matg e cuzza fin ils 31 da matg.
