Dapi l’onn passà organisescha la Repower mintgamai trais camps da trenament da hockey per giuvenils en il Grischun, quai sut la batgetta dal trenader naziunal Patrick Fischer e dad Andrea Kröni, la trenadra da las HCD Ladies.
Tranter ils trenaments han ils uffants pudì ir per in autogram dad Andrea Kröni e da Patrick Fischer ch’è vegnì duas giadas campiun svizzer sco giugader, il 1999 cun il HC Lugano ed il 2002 cun il HCD. Plinavant ha el gudagnà l’onn 2000 la Cuppa Spengler cun Tavau. Durant la stagiun 2006/2007 ha Fischer er giugà en la meglra liga da hockey dal mund, la National Hockey League, quai per ils Phoenix Coyotes. Suenter sia carriera sco giugader ha el lantschà ina carriera sco trenader. Dapi il 2015 trenescha Patrick Fischer, ch’ha oz 48 onns, l’equipa naziunala Svizra cun la quala el ha gudagnà il 2018 la medaglia d’argient al campiunadi mundial en il Danemarc.
Il terz camp da hockey cun uffants e giuvenils datti mez favrer a Schiers. Ed er en l’avegnir vul la Repower manar tras mintgamai trais camps ad onn en il Grischun. Fin il 2026 era mintgamai sut la batgetta da lur ambassadur Patrick Fischer.
