Ils gieus olimpics èn a fin per ils hockeyans svizzers. Els perdan en ils quartfinals cun 5:1 cunter il team finlandais. Il sulet gol per la Svizra ha Andres Ambühl marcà sin pass da Enzo Corvi curt avant la segunda pausa al 1:3. Guardà sur las 60 minutas è la Finlanda stada l'equipa pli rutinada, pli effizienta ed surtut han els fatg pli paucs sbagls che la Svizra.
La gronda finamira dals hockeyans svizzers era da recaltgar ina medaglia als gieus olimpics. I ha dentant mo dà paucas fasas da quest turnier, nua che l'equipa ha fatg la parita da propi tegnair pitg cun las grondas naziuns da hockey. Uschia turna la Svizra a chasa cun ina victoria e quatter terradas.
Buna prestaziun en otgavelfinals
En ils otgavelfinals avevan ils Svizzers gudagnà cun 4:2 cunter la Tschechia. Igl è l'emprima giada dapi l'onn 2010, ch'ils Svizzers stattan tar ils gieus olimpics en il quartfinal. Ils gols per vegnir en il quartfinal han fatg Andres Ambühl, Kilian Mottet, Denis Malgin e Raphael Diaz.
In motiv per la victoria da la Svizra è er il goalie, Leonardo Genoni. Dals 32 sajets tuns dals Tschecs sin ses gol, ha il Svizzer mo laschà atras dus.
