Orlando Cathomas da Domat è in dals fans svizzers ch’ha fatg il viadi en il Qatar per sustegnair al lieu la naziunala svizra. L’um pensiunà accumpogna dapi il 1994 la Svizra a tut ils gronds turniers sco campiunadis mundials u campiunadis d’Europa.
Durant ch’Orlando Cathomas ha anc pudì festivar avant paucs dis in 1:0 da la Svizra encunter il Camerun hai dà pauc da rir encunter la Brasilia. Ils Svizzers han pers cun 0:1, quai en in stadion quasi mo cun fans da la Brasilia. Tuttina è il fan rumantsch da buna speranza ch’i tanscha anc per l’equipa da Murat Yakin da sa qualifitgar per l’otgavelfinal. En il discurs cun Andreas Wieland ha Orlando Cathomas er raquintà da ses temp a Doha en il Qatar nua ch’el ha durmì las emprimas notgs en in container e lura midà sin ina nav da cruschera.
Il 1994 ha Orlando Cathomas fatg il viadi en ils Stadis Unids, en emprima lingia per visitar ils gieus da la Svizra, da lezzas uras cun Stéphane Chapuisat, Alain Sutter, Ciriaco Sforza u Georges Bregy, ma er per cumbinar il viadi cun visitar ses parents en l’America. Dapi quel onn ha il fan da ballape da Domat adina accumpagnà ils Svizzers. Il viadi al campiunadi mundial il 2006 en Germania ha Orlando Cathomas schizunt fatg cun ses velo ed ina bandiera svizra. Tut ils viadis ha el dentant er adina cumbinà cun vesair insatge dal pajais. Per discurrer cun ils indigens ha Cathomas schizunt emprendì divers linguatgs. En vista al campiunadi mundial il 2014 en la Brasilia ha el visità in curs da portugais ed en vista al campiunadi mundial il 2018 en Russia ha el emprendì russ.
Boicottar n’è stà nagina opziun
Malgrà ch’il campiunadi mundial en il Qatar frunta sin gronda critica, quai per differentas raschuns, èsi stà cler davent da la bell’entschatta che Orlando Cathomas vegnia er a far il viadi a Doha. Er sch’el na saja nagin fan da la FIFA e sch’el saja er stà encunter in tal campiunadi mundial en il Qatar, sco fan dals Svizzers na lessi el tuttina betg manchentar quest punct culminant, uschia Cathomas. Ma arab n'haja el questa giada betg emprendì. Ch’il campiunadi mundial saja uss durant il temp d’enviern na disturbi perencunter betg. Anzi, uss il november saja tar nus savens grisch e bletsch ed en il Qatar spetgia sulegl e temperaturas da stad.