Circa 150 uffants e giuvenils vegnan er quest onn puspè a far part a la lutga da mats da Sertig. La lutga en la val laterala da Tavau è la davosa lutga da mats da questa stagiun. Cler ch'ins vul alura anc ina giada mussar quai ch'ins ha emprendì durant l’entira stagiun. La lutga da mats a Sertig è in di avant la lutga dals «gronds» en il medem lieu.
Quatter differentas categorias da vegliadetgna
Tar la lutga da mats a Sertig pon uffants e giuvenils da nov fin a 15 onns prender part. En quatter differents categorias da vegliadetgna vegn cumbattì per il titel. Er in per giuvens lutgaders engiadinais vegnan ad esser da la partida tar la lutga da mats a Tavau Sertig.
Lutga da mats in di avant lutga dals «gronds»
La lutga da Sertig ha ina lunga tradiziun. La lutga che vegn organisada da la Societad da lutga da Tavau porscha dapi blers onns er in di nua che mats e giuvenils pon far la lutga. Pli baud avevan questas lutgas anc lieu tranter las lutgas dals «gronds». Perquai ch'il dumber da participants è creschì uschè ferm durant ils ultims onns, datti ozendi in di be per la lutga da mats. Circa 150 giuvenils vegnan era quest onn puspè ad esser da la partida. Tranter quels er in per da la Societad da lutga engiadinaisa.
