Sin Jonas Baumann che veva dà ses debut en la cuppa mundiala il december 2009 a Tavau, pia avant passa 15 onns, spetgan a Trondheim amez la Norvegia ils 8avels campiunadis mundials ch’el è da la partida. Duas giadas è el però sulet vegnì selecziunà sco currider da reserva. Fatg cursas ha Baumann il 2015 a Falun, il 2017 a Lahti, il 2019 a Seefeld, il 2021 ad Oberstdorf ed avant dus a Planica. En la Norvegia nua ch’il passlung è da chasa va quest viadi uss a fin.
Il currider da 34 onns parta en il skiatlon (29-02) ed en la cursa roiala sur ils 50 kilometers en il stil liber (08-02). La finamira saja franc in plaz sut ils top 20 e grondius fiss sch’i grategiass da vegnir ina giada sut ils top 10, insatge ch’el n’ha anc mai cuntanschì ad in eveniment grond. E sche tut va sco planisà fa Jonas Baumann er part a la staffetta svizra nua ch’il quartet svizzer ha l’ambiziun da cumbatter per ina medaglia.
Jonas Baumann è pront – la furma constat
Malgrà dus pitschens infects las davosas emnas haja el pudì trenar bain sin quest punct culminant da la stagiun. Baumann ha fatg l’entira preparaziun tar el a chasa a Tavau, quai er per betg esser uschè ditg davent da la famiglia ch’è per in grond sustegn, cunzunt er mental. Sia dunnas e las duas figlias vegnan a tegnai ils poleschs per el da chasa anora. Perencunter survegn el a Trondheim sustegn a l’ur da la loipa da ses geniturs e sia sora pli giuvna.
Che la furma constat ha Jonas Baumann cunzunt mussà il schaner cun top resultats en la cuppa mundiala. A Les Rousses en Frantscha è il currider rutinà da la Val Schons vegnì 8avel en la cursa sur 20 kilometers en il stil classic e paucs dis pli tard ha el pudì far per l’emprima giada en sia carriera il pass sin il podest en la cuppa mundiala. En l’Engiadina è Jonas Baumann vegnì terz en la cursa da staffetta maschedada.