Quai che ha cumenzà avant 10 onns sco schliaziun provisorica s’ha etabli suenter in decenni sco pli impurtanta cursa da passlung en il stil classic en Svizra. L’onn 2014 aveva Zuoz surprendì l’organisaziun da La Diagonela. Uss è la cursa part da la seria da cursas «Visma Ski Classics» ed ina da las pli grondas cursas da quest gener insumma. Varga 1'000 passlunghistas e passlunghists èn da la partida a La Diagonela. La gronda part da quellas èn curriduras e curridurs da professiun da la Scandinavia.
Ils favurits gudognan
Cun Emil Persson da la Svezia ed Astrid Slind da la Norvegia gudognan ils gronds favurits sin la victoria la cursa da giubileum en Engiadina. Ils umens svedais festiveschan cun Max Novak sco segund gest ina victoria dubla. Tar las dunnas è l’entir podest norvegiais. Astrid Slind gudogna avant Emilie Fleten e Magni Smedaas.
Cursa impurtanta per equipa da professiun dal BSV
Dapi tschintg onns datti tar la Federaziun grischuna da Skis, BSV, ina equipa da passlung ch’è spezialisada sin distanzas lungas. Il Team BSV Ibex. Per questa equipa è La Diagonela la cursa da chasa. Sco meglier indigen ha Gian Flurin Pfäffli terminà la cursa sin plazza 54. Nico Walther ch’è er part da la squadra Team BSV Ibex è vegni 68avel.
Bilantscha positiva dals organisaturs
Suenter in decenni è la cursa en il stil classic La Diagonela cun partenza a Puntraschigna ed arriv a Zuoz etablida. Ella vegn numnada cun las grondas cursas sco la «Marcialonga» u il «Vasaloppet». Quai che ha cumenzà fitg spontan tutga suenter in decenni en il chalender da las cursas en il stil classic. Davent da l’entschatta han ils organisaturs da La Diagonela tegnì ina fitg buna collavuraziun cun il Maraton da skis engiadinais. Omadus cursas han lur plazza en Engiadina e profiteschan ina da l’autra.
