Per l’emprima giada era la cursa da la Sfida integrada en la fin d’emna da las cursas da la Diagonela. Auter sco tar la Diagonela vegn dentant partì tar la Sfida en il stil liber ed era auter è che las curriduras ed ils curridurs curran da la val ensi, e betg aval.
Norvegiais a la testa, bunas prestaziuns dentant era dals indigens
Thomas Bucher-Johannessen er sin il traject da 28 kilometers da Zuoz fin a Silvaplauna il pli spert. Sia attatga è vegnida sin l’autezza dal God da Staz nua che nagin dals concurrents ha savì tegnair cunter. Thomas Bucher-Johannessen ha a la fin gudagnà cun l'avantatg da ina minuta e mesa avant Curdin Räz da Segl. Ina buna prestaziun ha era mussà l’anteriur campiun olimpic e campiun mundial Dario Cologna. El ha terminà la cursa sco tschintgavel.
Tar las dunnas è Ragnhild Fermsteinevik ida cun la plima. Er ella è norvegiaisa. Meglra indigena era Sandra Wagenführ da Tavau sco novavla.
Fin d’emna gartegiada
La fin d’emna da las cursas La Diagonela e La Sfida è gartegiada. Il comité d’organisaziun ha fatg ina bilantscha positiva. E cun in record da participants da passa 1’300 curriduras e curriders che han fatg part a las differentas cursas da La Diagonela e cun bundant 220 curriduras e curridurs ch'han fatg part a La Sfida èn els cuntents. Sa chapescha datti anc ina u l’autra chaussa ch'ins sa megliurar. Tut en tut tiran els dentant ina bilantscha positiva.
