Cun be 17 onns è Sara Schmied da Schlarigna gia la pli sperta giuvna skeletonista da l’Europa. Tar ils campiunadis europeics ad Innsbruck/Puntina ha ella cuntanschi l’emprima plazza. Sara Schmied è uschia per l’emprima giada campiunessa europeica en la categoria sut 20 onns. Suenter che la sportista engiadinaisa era vegnida il schaner vicecampiunessa mundiala da las junioras, è quest il segund meglier resultat da sia carriera.
L’entira stagiun è la meglra insumma
La stagiun da skeleton che va plaunet a fin è la meglra en la carriera da la giuvna Sara Schmied. Pervia dals buns resultats a l’entschatta da schaner ha ella pudì prender part als campiunadis mundials da bob e da skeleton a San Murezzan. E quai sco la pli giuvna skeletonista insumma. Plaun, plaunet pudess Sara Schmied uschia s’avischinar a l’elita dal mund.
Ils emprims pass en questa direcziun ha la giuvna da 17 onns fatg durant questa stagiun. La finamira n'è dentant anc ditg betg cuntanschida.
Nova schlitta, nova motivaziun
En vista a questa stagiun ha Sara Schmied anc midà il material. Ella ha cumprà ina nova schlitta. E questa schlitta ha funcziunà davent da l’entschatta fitg bain. Sara Schmied sa senta stupent sin la nova schlitta, perquai èn era pussaivels ils resultats ch’ella ha pudì mussar. A la fin da la stagiun spetgan uss il principi da mars anc ils campiunadis svizzers da skeleton a San Murezzan. Ed alura datti l’emprim in zichel pausa, avant che la preparaziun sin la nova stagiun cumenza puspè.
