Da Vancouver, il lieu da l'ultim gieu da la squadra naziunala, èn ils Svizzers sgulà directamain a Kansas City, il lieu dal quartfinal cunter l'Argentina.
Cunter ils Sidamericans han ils Svizzers gia dà duas giadas ad in campiunadi mundial – e pers duas giadas. Sper il 0:2 al campiunadi mundial il 1966 è surtut l'otgavelfinal al campiunadi mundial il 2014 anc en memoria. Là ha la naziunala pers 0:1 suenter la prolungaziun. Granit Xhaka e Ricardo Rodriguez eran gia lura da la partida.
L'ultima giada nua che la Svizra è stada en il quartfinal era tut auter
Cun la victoria cunter la Columbia ha la Svizra cuntanschì in success istoric. Per l'emprima giada en il temp modern da ballape è la Svizra en in quartfinal dal campiunadi mundial. L'ultima giada è quai stà il cas al campiunadi mundial da chasa il 1954. Ma da lez temp era il mund da ballape tut in auter.
Il 1954 n'ha betg guardà tut il mund sin il campiunadi mundial. Igl era schizunt l'emprima giada ch'ils gieus èn vegnids emess en la televisiun. Cunquai ch'apparats da televisiun eran da quest temp anc rars, vegnivan blers gieus guardads en ustarias – quasi ina furma tempriva dal public viewing. La tecnica era logicamain anc sin tut in auter stan. Uschia è la transmissiun dal final dal campiunadi mundial tranter l'Ungaria e la Germania vegnida fatga cun sulet trais cameras.
Il quartfinal cunter l'Argentina gioga la Svizra la notg sin dumengia (03:00, temp svizzer) a Kansas City en il stadi american da Missouri.
L'arena da l'equipa da la NFL Kansas City Chiefs tschiffa 73'000 aspectaturas ed aspectaturs ed è enconuschenta sco «enfiern» («Hexenkessel»).
Notg libra en tscherts lieus en la Svizra
En divers lieus en la Svizra datti tranter sonda e dumengia ina notg libra. Tranter auter era a Cuira. La regenza da la citad ha decidì che manaschis en la miglia da sortida Welschdörfli che ston normalmain serrar a las 03:00, dastgan mussar il gieu endadens. Tut ils auters manaschis che serran normalmain avant las 03:00 dastgan medemamain mussar il gieu. Els ston dentant dumandar ina lubientscha per prolungar l'ura da polizia.
En il rest da la Svizra datti notgs libras a Turitg, Winterthur, Berna, Lucerna, Zug ed era en divers chantuns datti reglamentaziuns che permettan ina notg libra.