Durant l’emna da las cursas dal Lauberhorn èn ils hotels a Wengen occupads fin il davos letg, la gronda part da las equipas. Ils Americans prendan per exempel dapi onns dimora en l’Arenas Resort Victoria-Lauberhorn, in dals gronds hotels gist a la staziun da Wengen.
Arenas Resort Victoria Lauberhorn sut batgetta rumantscha
Dapi dus onns è Niculin Manzoni directur da quest hotel. El ha 28 onns ed è oriund da Samedan en l’Engiadin’Ota. Arrivà a Wengen è Manzoni plitost tras ina casualitad. Durant sia scolaziun a Lucerna ha el frequentà a Wengen ses praticum. Silsuenter è el gist restà en la Part Sura Bernaisa, l’emprim sco schef da la recepziun, oz sco directur.
Niculin Manzoni è er led che las cursas da skis han lieu cun public. Ma tut quai haja er procurà per sforzs supplementars, per evitar ch’il coronavirus sa derasi anc pli fitg – gist tar ils atlets uschè curt avant ils gieus olimpics a Peking. Perquai stoppian tut ils collavuraturs e las collavuraturas da l'hotel era adina puspè far tests da corona, e durant la saira na dettia nagin buffet pli. Quai be duas da las mesiras che Manzoni ha stuì prender durant quels dis da las cursas dal Lauberhorn.
