Siglir tar il cuntegn

Header

video
Ils highlights da l'ultima partida da Federer
Or da Sport-Clip dals 24.09.2022.
laschar ir. Durada: 7 minutas 27 Secundas.
cuntegn

Laver Cup a Londra La carriera incredibla dal «Maestro» va a fin a moda emoziunala

Roger Federer ha pers sia ultima partida sco profi a moda dramatica. En il dubel cun Rafael Nadal ha el pers al Laver Cup a Londra cunter il duo american Jack Sock e Frances Tiafoe en trais sets cun 6:4, 6:7 e 9:11. Cun applaus frenetic da las aspectaturas ed ils aspectaturs ed en preschientscha da sia famiglia ha Federer anc fatg inqual punct remartgabel.

Jau sun ventiraivel, betg trist.
Autur: Roger Federer suenter sia ultima partida da la carriera

Ses plaschair da giugar è stà evident. En il tiebreak final han il Svizzer ed il Spagnol manchentà ina balla da matsch tar il stan da 9:8. Curt suenter è la partida ida a fin suenter passa duas uras en favur dals Americans – ed uschia er la carriera excepziunala dal Maestro ch’ha cun 41 onns anc ina giada mussà sia entira classa.

Suenter la partida hai dà in cumià zunt emoziunal. Betg mo Federer n'ha spons larmas, mabain er bunamain tuts giugaders preschents. En emprima lingia ses gronds rivals Rafael Nadal e Novak Djokovic. Natiralmain è er la famiglia Federer vegnida fitg emoziunala. Ses quatter uffants èn stads preschents e commuventads, sco er sia dunna Mirka e ses geniturs Lynette e Robert. Els tuts han procurà per in cumià tut spezial e degn.

RTR novitads 06:00

Artitgels legids il pli savens