Siglir tar il cuntegn

Header

HCD demontescha Kloten cun 7:0
Or da Sport-Clip dals 24.09.2022.
cuntegn

Liga naziunala HCD dat ina lecziun a Kloten

Suenter trais terradas al cumenzament da la stagiun, mintgamai suenter sajettar penaltis, n’ha il HCD laschà nagina schanza a Kloten, l’equipa che vegnida promovida quest onn en la liga naziunala. Tavau ha dictà il tempo davent da l’emprima minuta e cun 7:0 schizunt procurà per in resultat da gala.

Gia en l’emprima minuta ha il capitani Andres Ambühl tuc al 1:0. Cun dus ulteriurs gols da powerplay entras Dennis Rasmussen e Matej Stransky manava Tavau gia cun 3:0 suenter l’emprim terz. Kloten na betg pudì sa revegnir da questa duscha fraida. Anzi, Tavau ha silsuenter controllà il gieu ed er nizzegià lur schanzas da gol. Ambühl cun ses segund gol ha procurà per il 4:0 en il segund terz ed en il davos terz han anc ina giada Rasmussen, lura Michael Fora ed a la fin il topscorer Leon Bristedt procurà per il resultat final.

Durant che l’EHC Kloten resta cun in sulet punct a la cua da la tabella po il HCD far in sigl enavant sin il 6avel plaz.

Mardi proxim spetga lura ina pli dira nusch sin l’equipa da Christian Wohlwend. Il HCD retschaiva mardi saira a las 19:45 uras a chasa l’actual campiun svizzer, l’EV Zug.

Las ulteriuras partidas da la quarta runda

  • Ils SCL Tigers perdan cunter Bienna cun 1:6.
  • Ajoie perda cunter Ambri cun 4:5 suenter prolungaziun.
  • Berna gudogna cunter ils Lakers cun 3:2.
  • Friburg perda cunter Zug cun 2:5.
  • Genevra batta Lugano cun 5:2.

Tabella hockey liga naziunala

Avrir la box Serrar la box

Link tar Federaziun da hockey

RTR novitads 20:00

Artitgels legids il pli savens

Scrollar a sanestra Scrollar a dretga