Gia avant il gieu dad oz eri cler ch'il victur fa in pass enavant en la tabella. Igl è quasi stà in derby per il quart plaz da la tabella da la liga naziunala da hockey. Gia suenter 17 secundas ha Ambühl sajettà il 1:0 per Tavau e suenter 55 secundas ha Aberg egualisà per ils Lakers. Curt avant l'emprima pausa ha Nussbaumer sajettà en avantatg il HCD.
En il segund terz ha l'equipa songagliaisa pudì egualisar en la 25avla minuta ed en la 32avla minuta ha danovamain Ambühl pudì sajettar il 3:2 per Tavau. Curt avant la fin ha lura Nordström tutgà il gol vid e francà la victoria dal club da hockey da Tavau.
Suenter la victoria il mardi cunter Genevra-Servette, ch'è a la testa da la tabella, ha l'equipa grischuna uschia pudì profitar dal schlantsch en il chantun Son Gagl. Dals quatter duels cunter ils Lakers da questa stagiun ha il HCD gudagnà trais.
Ils resultats dals ulteriurs gieus da questa saira:
- Ambri – Friburg 2:4
- Losanna – Genevra 2:6
- SCL Tigers – EV Zug 2:3 suenter sajettar penaltis
