Davent da l’entschatta era el il grond favurit, e davent da l’entschatta ha Samuel Giger surprendi questa rolla. Fin tar la lutga finala era el quel che ha mess si il bul a ‘sia’ festa, a la festa da la Schwägalp. La davosa lutga da muntogna da questa stagiun è la lutga da chasa dals lutgaders da la Svizra dal Nordost NOS. La bilantscha da Samuel Giger è uschia quasi senza macla. Il lutgader dal chantun Turgovia ha gudagnà tschintg da sis lutgas, mo ina giada ha el tegni in pari.
Duos duels encunter Rychen e duos giadas è Giger il victur
Gia en la terza lutga era quai vegni sin la Schwägalp al duel encunter Roger Rychen. Gia alura aveva Giger gudagnà il duel, sco era en la lutga finala. Cun la victoria da record tar la lutga da la Schwägalp va Samuel Giger uss cun la meglier pussaivla preparaziun a la festa federala. Ma na be Samuel Giger ha persvadi sin la Schwägalp. Insumma l’entira squadra dal NOS ha mussà bunas prestaziuns. Dals quattordesch cranz ch’en vegnids surdads han otg lutgaders dal NOS gudagnà questa distincziun.
Greva lutga per ils frars Marc e Corsin Jörger da Domat
Entant che Samuel Giger ha gudagnà la lutga da la Schwägalp avant Samir Leuppi e Roger Rychen / Werner Schlegel na han ils lutgaders grischuns betg savì lutgar fin il davos sin la Schwägalp. Per Marc e Corsin Jörger era il cumbat suenter quatter lutgas a fin. Marc Jörger ha cumenzà cun in pari encunter Manuel Bollhalder. La segunda lutga ha el alura pers cunter Théo Rogivue. Pers ha el era cunter Lukas Döbeli e Paul Tornare. E Corsin Jörger ha pers tut las quatter lutgas. L’emprim cunter Dean Burch e suenter era cunter Lars Rotach. Ed era encunter Gil Dufey e Dominik Schwegler.
Cumià d’in dals gronds da la scena da lutga
En sia stretga patria sin il cunfin tranter ils chantuns Son Gagl ed Appenzell di Arnold ‘Nöldi’ Forrer adia. En la vegliadetgna da 43 onns e suenter ch'el ha gudagnà dacurt il 151avel cranz da sia carriera piglia il signun cumià dal sport da lutga activ. Davent dal principi dal nov millenni è Forrer stà ina figura clav en il sport da lutga. Ensemen cun ses amis da lutga dal Toggenburg – surtut cun il retg da lutga Jörg Abderhalden – ha el purtà il sport sin in nov livel. Nöldi Forrer aveva lantschà sia carriera da lutgader cun il titel dal retg da lutga l’onn 2001 tar la festa federala a Nyon.
