Siglir tar il cuntegn

Header

cuntegn

Memia blers cas positivs Campiunadi mundial da hockey U20 annullà

Memia blers giugaders èn vegnids testads positiv sin il coronavirus. Cun stuair trametter tantas equipas en quarantina, na fetschia il turnier nagin senn pli. Perquai ha l'Organisaziun internaziunala dal hockey IIHF decidì dad annullar il turnier.

Il campiunadi mundial dals hockeyners U20 en il Canada, è vegnì interrut. Quai suenter che trais equipas han gì plirs cas da corona. Il mardi aveva la Svizra gudagnà forfait pervia da cas da corona tar la squadra americana. In di pli pli tard, èn lura er giugaders da la Tschechia e la Russia vegnids testads positiv. Er els han stuì dar forfait ed ir en quarantina. Per proteger ils participants, ha l'associaziun mundiala dal hockey entant decis dad annullar cumplettamain il turnier.

Nus essan sportist, charezzain il cumbat encunter autras naziuns. I duess dentant dar cundiziuns gistas per tuts, quai n'era betg pli dà.
Autur: Marco Bayer Trenader da l'equipa svizra

Natiralmain sajan ins trumpà ch'il turnier è vegnì desditg cumplettamain, per il trenader da l'equipa svizra, Marco Bayer, è la decisiun dentant raschunaivla ed endretga. Ins haja bain gì la speranza da pudair giugar vinavant, ha ditg Bayer. L'equipa saja stada sin la dretga via.

Pli dira è questa decisiun per ils giugaders da l'annada 2002. Per els èsi stà l'ultima pussaivladad da far part da quest turnier dals U20. Da l'equipa svizra èn gist 14 giugaders pertutgads. Dentant po il trenader er s'imaginar ch'i pudess anc dar ina nova versiun dal turnier. Quai è stà il cas tar las dunnas che han giugà l'avust il turnier ch'era vegnì desditg.

Il turnier n'è betg be impurtant per ils giugaders, mabain er per ils scouts, ils organisaturs ed ils pajais.
Autur: Marco Bayer Trenader da l'equipa svizra

Cura ch'ils giugaders pon turnar a chasa n'era anc betg cler. L'emprima prioritad saja che tuts restian sauns.

RTR novitads 06:00

Artitgels legids il pli savens

Scrollar a sanestra Scrollar a dretga